Alqasözge qatısqan oqıtuşılar men studentter. Foto: QT

Bügin äl-Farabi atındağı Qazaq Wlttıq universiteti jurnalistika fakul'tetiniñ ğalımdarı, oqıtuşıları, dizaynerleriniñ jäne önertanuşılardıñ qatısuımen «Qazaqstanda dizaynerlik bilim berudi jañğırtu: özekti mäseleleri men tanım kökjiegi» attı alqasöz ötti.

Fakul'tet studentteri, magistranttarı men doktoranttarı qatısqan alqasözde Qazaqstandağı dizayn öneri damuınıñ negizgi bağıttarı; mätindik jäne beynelik aqparattı dizaynerlik öñdeu men bezendirudiñ zamanaui jüyesi, baspa önimderi dizaynınıñ innovaciyalıq tehnologiyaları talqılandı.

"Baspagerlik-redaktorlıq jäne dizaynerlik öner" kafedrasınıñ meñgeruşisi Jetpisbay Bekbolattıñ sözinşe, FIBAA Agenttigi Komitetiniñ (FIBAA Accreditation Committee) 2017 jılğı 24 qaraşada «5V042100-Dizayn» mamandığı bakalavriatınıñ oqu bağdarlamasın halıqaralıq akkreditteuden ötkizip, dizayn salasındağı bakalavriat bağdarlamasın naqtı türde grafikalıq jäne media-dizaynğa şoğırlandıru, sonday-aq qoldanbalı bakalavriat jüyesi boyınşa oqu merzimin qısqartu turalı wsınıs jasağan.

"Baspagerlik-redaktorlıq jäne dizaynerlik öner" kafedrasınıñ meñgeruşisi Jetpisbay Bekbolat pen jurnalistika fakul'tetiniñ dekanı Sağatbek Medeubek. Foto: QT

"Europa memleketterinde eşbir jer dizayn mamandığın 5 jıl oqıtpaydı. Oqu merzimi eki nemese üş jıl ğana. Olardıñ wsınısı bizdegi oqıtudı da osılay qısqartu. Odan keyin  jalpı biz oqıtıp otırğan dizayn mamandığı tım jalpılama, onı naqtılau kerek. Sondıqtan olar "Mediadizayn" nemese "Bwqaralıq aqparat qwraldarınıñ dizaynı" degendi wsınıp otır", - deydi Jetpisbay Bekbolat.

T. Jürgenov atındağı öner akademiyası dizayn kafedrasınıñ professorı Qambarbek Köşenov te şeteldik media salasındağı täjiribe turalı ayta kelip, olarda da dizayn mamandığı 2-3 jıl ğana oqıtılatının aytadı.  Onıñ sözinşe, Germaniyada kommunikaciyalıq dizayn jäne öndiris dizaynı degen bar. Kommunikaciyalıq dizaynğa barlığı, yağni mediadağı nemese animaciya dizaynı da kiredi eken.

"Osı mamandıq işinen barlıq maman şığadı. Mısalı onda bireui kosmos kemesin jasap jatır. Bastısı olar tapsırıs qabıldaydı. Studentter solar boyınşa jwmıs isteydi. Olarda barlıq tehnikalıq baza jetkilikti. Al bizdegi kemşin dünie osı. Bwdan bölek bizde üş jıldıq mäselesi bolıp otır. Bizge köbine studentter kolledjdi bitirip kelip tüsedi.  Bizge kelip tağı eki jıl uaqıtın äleumettik gumanitarlıq sabaqtarmen ötkizedi. Osıdan keyin olar bizdiñ akademiyağa tüsken künniñ özinde qayda tüskenin wmıtıp qaladı. YAğni basqa gumanitarlıq sabaqtarmen olardı basıp tastaydı", - deydi Qambarbek Köşenov.

T. Jürgenov atındağı öner akademiyası dizayn kafedrasınıñ professorı Qambarbek Köşenov. Foto: QT

Sonday-aq, ol elimizde mamandıqtı oqıtu merzimi qısqarsa, mwğalimder sağatınıñ da qısqaru jüyesi qalıptasqanın aytadı. Al mwnday jüyeniñ bolmağanı jön.

"Mısalı Germaniyada sağat qısqaru degen tüsinik joq. Jalpı kredit sağatı bar. Olar bir professordı jwmısqa alsa onı sol jerde bes jıl wstap otıradı. Professor jäne lekciya oquşı professor jwmıs isteydi. Olarğa belgili bir jalaqı tağayındaladı jäne olar sol boyınşa ğana jwmıs isteydi. Sağat kemidi degen eşqanday qorqınış joq", - deydi ol.

Dizaynerlerdiñ euraziyalıq odağınıñ törağası Ermek Asılhanov bolsa ükimet dizayn mamandığına az grant böletinin aytadı.

Dizaynerlerdiñ euraziyalıq odağınıñ törağası Ermek Asılhanov. Foto: QT

"18 mln halqı bar elde 45 granttıñ 25-i qazaqşa, 15-i orısşa oqitındarğa bölinedi. Mısalı Euraziya wlttıq universitetinde, memlekettik universitetterde dizayn mamandığında oqitın 30 studenttiñ işinde tek eki-üşeui ğana grantta oqidı. Qalğanı aqı töleydi. Al bwl sistemanı bwzıp, osında aytılğan jüyeni tezirek qabıldau kerek. Arnayı jwmıs tobı qwrılıp, qolğa alınuğa tiis", - deydi Ermek Asılhanov.

“The Qazaq Times”