Moldovalıq biznesmen Anatoliy Statidiñ şağımı qabıldanbadı. Foto: Unimedia

2018 jılğı 11 qañtarda Angliyanıñ Apellyaciyalıq sotınıñ Azamattıq ister jönindegi sot alqası Moldovanıñ azamatı A.Stati jäne basqalarınıñ Qazaqstan paydasına şığarılğan sot şeşimine şağım jasauğa rwqsat beru jönindegi ötinişin qabıldamay tastadı. Ötiniş 2017 jılğı 6 mausımda berilgen, dep habarladı QR ädilet ministrliginiñ baspasöz qızmeti.

"Angliyanıñ Joğarı sotı 2017 jılğı 6 mausımdağı öz şeşiminde Qazaqstan Respublikasınıñ "2013 jılğı 19 jeltoqsandağı törelik tribunaldıñ şeşimi alayaqtıqqa negizdelgen jäne onıñ orındaluı Angliyanıñ qoğamdıq tärtibine qayşı keledi" degen  mälimdemesin qoldadı", - delingen habarlamada.

Ministrliktiñ mälimetinşe, bwdan bwrın, 2017 jılğı 27 mausımda  Angliyanıñ Joğarı sotı da A.Statige alayaqtıq faktilerin ağılşın ädil sotında mäni boyınşa qarauğa mümkindik bergen şeşimge şağım jasauğa mümkindik beruden bas tartqan.

"Qazaqstan Respublikası talapkerler tarapınan orın alğan alayaqtıq faktilerin däleldeudi jalğastıradı jäne şamamen 2018 jılğı qazan ayına belgilengen tıñdaularda tiisti dälelderdi wsınatın boladı. Atalğan is boyınşa memlekettiñ müddelerin bildirudi jäne qorğaudı «Herbert Smith Freehills LLP» halıqaralıq zañ firmasınıñ qatısuımen QR ädilet ministrligi qamtamasız etude", - delingen vedomstvo habarlamasında.

Ayta keteyik, 2017 jıldıñ jeltoqsan ayında moldovalıq biznesmen Stati  tüsirgen şağımına baylanıstı Qazaqstan Wlttıq qorınıñ 22 mlrd dolları bwğattalğan edi. Äzirge bwl qarajattıñ qalay qaytarılatını belgisiz.

“The Qazaq Times”