QR prezidenti Nwrswltan Nazarbaev AQŞ-tıñ isker toptar ökilderimen kezdesti. Foto: akorda.kz

Qazaqstan prezidenti Nwrswltan Nazarbaev AQŞ-qa saparı kezinde eki el arasında ornıqqan qatınastardıñ mañızdılığı men strategiyalıq sipatına toqtaldı, dep habarlaydı Aqordanıñ resmi saytı. 

– Amerika Qazaqstan ekonomikasına salınğan tikeley investiciyalardıñ kölemi boyınşa ekinşi orında. Täuelsizdik jıldarı işinde sizderdiñ kompaniyalarıñız tarapınan Qazaqstanğa 50 milliard dollardan astam investiciya qwyıldı. Ötken jılı eki el arasındağı tauar aynalımı 2 milliard dollarğa jetti. Bizdiñ elde energetika, kölik, innovaciya, medicina jäne basqa da salalarda Amerika kapitalınıñ qatısuımen 500-den asa kompaniya tabıstı jwmıs istep keledi. Bizdiñ iri seriktesterimizdiñ qatarında Şevron, Ekson Mobil, Djeneral Elektrik, Helliberton jäne basqa da kompaniyalar bar, – dedi Nwrswltan Nazarbaev.

Memleket basşısı eki jaqtı qatınastardıñ keñ auqımın qamtitın Keñeytilgen strategiyalıq äriptestik turalı birlesken mälimdemeni qabıldaudıñ erekşe mañızdılığın atap ötti.

Bwdan bölek  prezident Qazaqstannıñ kölik-tranzittik äleuetin damıtu üderisine toqtalıp, biznes jürgizu üşin memleket tarapınan jağday jasauğa bağıttalğan şaralar jöninde äñgimelegen.

Sonday-aq, Nwrswltan Nazarbaev «Astana» halıqaralıq qarjı ortalığınıñ erekşe märtebesin atap ötip, onıñ jwmısınıñ aldağı josparlarına toqtalğan. Prezidenttiñ sözinşe, «Astana» HQO qatısuşılarına 50 jılğa deyin salıqtıq, valyutalıq, vizalıq jäne eñbek rejimderi siyaqtı jeñildikter beriledi. Atalğan ortalıqtıñ joğarı tehnologiyalıq birjasın qwruğa Şanhay qor birjası jäne NASDAQ amerikalıq birjası tartılğan.

“The Qazaq Times”