قازاقستان مەن اقش اراسىنداعى تاۋار اينالىمى 2 ملرد دوللار بولعان

قازاقستان پرەزيدەنتى نۇرسۇلتان نازارباەۆ اقش-قا ساپارى كەزىندە ەكى ەل اراسىندا ورنىققان قاتىناستاردىڭ ماڭىزدىلىعى مەن ستراتەگيالىق سيپاتىنا توقتالدى، دەپ حابارلايدى اقوردانىڭ رەسمي سايتى. 

– امەريكا قازاقستان ەكونوميكاسىنا سالىنعان تىكەلەي ينۆەستيتسيالاردىڭ كولەمى بويىنشا ەكىنشى ورىندا. تاۋەلسىزدىك جىلدارى ىشىندە سىزدەردىڭ كومپانيالارىڭىز تاراپىنان قازاقستانعا 50 ميلليارد دوللاردان استام ينۆەستيتسيا قۇيىلدى. وتكەن جىلى ەكى ەل اراسىنداعى تاۋار اينالىمى 2 ميلليارد دوللارعا جەتتى. ءبىزدىڭ ەلدە ەنەرگەتيكا، كولىك، يننوۆاتسيا، مەديتسينا جانە باسقا دا سالالاردا امەريكا كاپيتالىنىڭ قاتىسۋىمەن 500-دەن اسا كومپانيا تابىستى جۇمىس ىستەپ كەلەدى. ءبىزدىڭ ءىرى سەرىكتەستەرىمىزدىڭ قاتارىندا شەۆرون، ەكسون موبيل، دجەنەرال ەلەكتريك، حەلليبيورتون جانە باسقا دا كومپانيالار بار، – دەدى نۇرسۇلتان نازارباەۆ.

مەملەكەت باسشىسى ەكى جاقتى قاتىناستاردىڭ كەڭ اۋقىمىن قامتيتىن كەڭەيتىلگەن ستراتەگيالىق ارىپتەستىك تۋرالى بىرلەسكەن مالىمدەمەنى قابىلداۋدىڭ ەرەكشە ماڭىزدىلىعىن اتاپ ءوتتى.

بۇدان بولەك  پرەزيدەنت قازاقستاننىڭ كولىك-ترانزيتتىك الەۋەتىن دامىتۋ ۇدەرىسىنە توقتالىپ، بيزنەس جۇرگىزۋ ءۇشىن مەملەكەت تاراپىنان جاعداي جاساۋعا باعىتتالعان شارالار جونىندە اڭگىمەلەگەن.

سونداي-اق، نۇرسۇلتان نازارباەۆ «استانا» حالىقارالىق قارجى ورتالىعىنىڭ ەرەكشە مارتەبەسىن اتاپ ءوتىپ، ونىڭ جۇمىسىنىڭ الداعى جوسپارلارىنا توقتالعان. پرەزيدەنتتىڭ سوزىنشە، «استانا» حقو قاتىسۋشىلارىنا 50 جىلعا دەيىن سالىقتىق، ۆاليۋتالىق، ۆيزالىق جانە ەڭبەك رەجىمدەرى سياقتى جەڭىلدىكتەر بەرىلەدى. اتالعان ورتالىقتىڭ جوعارى تەحنولوگيالىق بيرجاسىن قۇرۋعا شانحاي قور بيرجاسى جانە NASDAQ امەريكالىق بيرجاسى تارتىلعان.

“The Qazaq Times”