Foto ğalamtor betterinen alındı.

Iranda ötken aptada bastalğan qoğamdıq qarsılıqtar äli de toqtağan joq. Memlekettik aqparat qwralı ötken tüni qauipsizdik qızmetkerleri men halıq arasındağı qaqtığıstan 9 adam qaza tapqanın habarladı. Osı uaqıtqa deyin 22 azamattıñ ömirin qiğan halıqtıñ narazılıq şarası äueli eldegi bağalardıñ köteriluin sınğa alıp, keyinnen ömir süru deñgeyiniñ tömendigi, kedeyşilik pen jwmıssızdıq siyaqtı äleumettik mäseleler men şet eldegi äskeri operaciyalarğa qıruar qarjı jwmsap otırğan bilikti ayıptağan sayasi sipatqa wlastı. Bwl turalı VVS aqparattıq agenttigi jazdı. 

Irannıñ dini jäne memlekettik qayratkeri Ayatolla Äli Hameney öziniñ ğalamtordağı paraqşasında: "Irannıñ jauları memleket işindegi tınıştıqtı bwzu üşin qarjı, qaru, sayasat jäne barlau qızmeti siyaqtı barlıq qwraldardı paydalanıp otır", - dep jazdı. Sarapşılar mwndağı "Irannıñ jauları" degen söz tirkesiniñ astarında AQŞ, Izrail' men Saud Arabiyası twrğanın aytadı.

Irannıñ Prezidenti Hasan Rouhani AQŞ-tıñ memlekettik basşısı Donal'd Tramptıñ tvitter jazbaları arqılı şeruşilerdi qoldağanın ayıptadı. Amerika köşbasşısı jeke paraqşasında: "Iran halqı jemqor bilik rejimine qarsı äreket ete bastadı. Prezident Obamanıñ Iranğa bergen barlıq qarjısı terrorizm men bileuşi twlğalardıñ qaltasına ketti. Sondıqtan da irandıqtar ülken inflyaciya, azıq-tülik tapşılığı jäne adam qwqıqtarınıñ taptaluına wşıradı. Amerika bärin baqılap otır", -dep jazğan bolatın. AFP aqparattıq agenttigi Irannıñ Sırtqı İster ministrligi joğarıda berilgen tvitter jazbasına: "Donal'd Tramp öz elindegi baspanasız jäne aş adamdarğa köñil bölgeni dwrıs" degen jauap qatqanın jazdı.

Euroodaq Iran halqınıñ beybit şeruge şığu qwqığın moyındap, jağdaydı baqılauda wstau üşin bilik ökilderimen baylanısta ekenin jetkizdi. Türkiya halıqtıñ qauipsizdigine alañdauşılıq bildirip, äskeri eskalaciyadan aulaq boluğa şaqırdı. Irannıñ Prezidenti Hasan Rouhani da el azamattarınıñ köşege şığıp, narazılıq bildiruine qarsı emestigin ayttı. Tek, "qoğamdıq tärtipti bwzğandar qatañ jazalanadı!", - dedi ol. Resmi derekterge säykes, soñğı künderi Tehran aumağında 450 adam abaqtığa jabılğan.

“The Qazaq Times”