فوتو عالامتور بەتتەرىنەن الىندى.

يراندا وتكەن اپتادا باستالعان قوعامدىق قارسىلىقتار ءالى دە توقتاعان جوق. مەملەكەتتىك اقپارات قۇرالى وتكەن ءتۇنى قاۋىپسىزدىك قىزمەتكەرلەرى مەن حالىق اراسىنداعى قاقتىعىستان 9 ادام قازا تاپقانىن حابارلادى. وسى ۋاقىتقا دەيىن 22 ازاماتتىڭ ءومىرىن قيعان حالىقتىڭ نارازىلىق شاراسى اۋەلى ەلدەگى باعالاردىڭ كوتەرىلۋىن سىنعا الىپ، كەيىننەن ءومىر ءسۇرۋ دەڭگەيىنىڭ تومەندىگى، كەدەيشىلىك پەن جۇمىسسىزدىق سياقتى الەۋمەتتىك ماسەلەلەر مەن شەت ەلدەگى اسكەري وپەراتسيالارعا قىرۋار قارجى جۇمساپ وتىرعان بيلىكتى ايىپتاعان ساياسي سيپاتقا ۇلاستى. بۇل تۋرالى ۆۆس اقپاراتتىق اگەنتتىگى جازدى. 

يراننىڭ ءدىني جانە مەملەكەتتىك قايراتكەرى اياتوللا ءالي حامەنەي ءوزىنىڭ عالامتورداعى پاراقشاسىندا: "يراننىڭ جاۋلارى مەملەكەت ىشىندەگى تىنىشتىقتى بۇزۋ ءۇشىن قارجى، قارۋ، ساياسات جانە بارلاۋ قىزمەتى سياقتى بارلىق قۇرالداردى پايدالانىپ وتىر", - دەپ جازدى. ساراپشىلار مۇنداعى "يراننىڭ جاۋلارى" دەگەن ءسوز تىركەسىنىڭ استارىندا اقش، يزرايل مەن ساۋد ارابياسى تۇرعانىن ايتادى.

يراننىڭ پرەزيدەنتى حاسان روۋحاني اقش-تىڭ مەملەكەتتىك باسشىسى دونالد ترامپتىڭ تۆيتتەر جازبالارى ارقىلى شەرۋشىلەردى قولداعانىن ايىپتادى. امەريكا كوشباسشىسى جەكە پاراقشاسىندا: "يران حالقى جەمقور بيلىك رەجيمىنە قارسى ارەكەت ەتە باستادى. پرەزيدەنت وبامانىڭ يرانعا بەرگەن بارلىق قارجىسى تەرروريزم مەن بيلەۋشى تۇلعالاردىڭ قالتاسىنا كەتتى. سوندىقتان دا يراندىقتار ۇلكەن ينفلياتسيا، ازىق-تۇلىك تاپشىلىعى جانە ادام قۇقىقتارىنىڭ تاپتالۋىنا ۇشىرادى. امەريكا ءبارىن باقىلاپ وتىر", -دەپ جازعان بولاتىن. AFP اقپاراتتىق اگەنتتىگى يراننىڭ سىرتقى ىستەر مينيسترلىگى جوعارىدا بەرىلگەن تۆيتتەر جازباسىنا: "دونالد ترامپ ءوز ەلىندەگى باسپاناسىز جانە اش ادامدارعا كوڭىل بولگەنى دۇرىس" دەگەن جاۋاپ قاتقانىن جازدى.

ەۋرووداق يران حالقىنىڭ بەيبىت شەرۋگە شىعۋ قۇقىعىن مويىنداپ، جاعدايدى باقىلاۋدا ۇستاۋ ءۇشىن بيلىك وكىلدەرىمەن بايلانىستا ەكەنىن جەتكىزدى. تۇركيا حالىقتىڭ قاۋىپسىزدىگىنە الاڭداۋشىلىق ءبىلدىرىپ، اسكەري ەسكالاتسيادان اۋلاق بولۋعا شاقىردى. يراننىڭ پرەزيدەنتى حاسان روۋحاني دا ەل ازاماتتارىنىڭ كوشەگە شىعىپ، نارازىلىق بىلدىرۋىنە قارسى ەمەستىگىن ايتتى. تەك، "قوعامدىق ءتارتىپتى بۇزعاندار قاتاڭ جازالانادى!", - دەدى ول. رەسمي دەرەكتەرگە سايكەس، سوڭعى كۇندەرى تەھران اۋماعىندا 450 ادام اباقتىعا جابىلعان.

“The Qazaq Times”