Foto: AFP

Irannıñ soltüstigindegi Reşt, batısındağı Kermanşah qalalarında bastalğan Ükimetke qarsı narazılıq şeruleri, Isfahan, Hamadan siyaqtı şağın aymaqtarda jalğasın taptı. Qoğamdıq qarsılıq şarası bağalardıñ ösuin sınap, dini qızmetkerlerdiñ  biligin, sırtqı sayasatqa esepsiz qarjı jwmsaluın ayıptadı. Bwl - Iranda 2009 jılı saylau qorıtındılarımen kelispegen halıqtıñ qarsılıq şeruinen keyin qaytalanıp otırğan ekinşi narazılıq akciyası.

VVS tilşileri "Din qızmetkerleri özderin Qwday siyaqtı wstaytın boldı" degen wrandardıñ bolğanın habarladı. Ruhani bağıttağı basşılardıñ äreketin qwptamaytındar dini qızmetkerlerdiñ eñ köp böligi şoğırlanğan Kuma qalasınan da tabıldı.

Halıq sanı jöninen eñ köp adamdar tobın jinağan narazılıq şerui Maşad qalasında ötip, onda 52 azamat twtqındalğan. Tehran qalasında da birneşe adamnıñ wstalğanı belgili boldı. El astanasınıñ qauipsizdik qızmetine jauaptı twlğa abaqtığa jabılğandar ortalıq alañğa jinalğan  şaqtı adamnıñ arasında bolğanın jariyaladı. Osıdan aldın Tehran qalasınıñ basşısı policiya  bastı alañdağı halıqtıñ kez kelgen şoğırın taratuğa qwqılı ekenin eskertken edi.

Narazılıq şeruin wyımdastıruşılar halıqtı qarsılıq akciyasına äleumettik jeliler arqılı şaqırğan. Facebook-te Kermanşahtağı qauipsizdik küşteri men beybit twrğındardıñ qaqtığısı körsetilgen beynejazba jariyalandı. Halıqtıq qarsılıq bir aptanıñ işinde jwmırtqa bağası eki ese öskennen keyin, memleket basşısınıñ mäseleni qadağalay almay otırğanına narazılıqtan bastalğan. Är qalada jinalğan azamattar ärtürli talaptardı alğa tarttı. Joğarıda atalğan sebepterden bölek, alañğa şıqqandardıñ qatarında sayasi twtqındardı bosatudı swrağandar da bar.

Revolyuciyalıq gvardiya men birneşe barlau agenttikteri halıqtı qatañ baqılauda wstaytın Iranda narazılıq şeruleri jii boy körsetetin qwbılıs emes. Degenmen osı aptanıñ beysenbisinen bastap jalğasıp kele jatqan qarsılıqtar halıqtıñ eldegi ekonomikalıq jağdaydıñ kürt tömendeui men qazirgi biliktiñ köp äreketin qwptamaytının körsetedi. VVS-diñ zertteuine säykes, irandıqtar soñğı 10 jılda 15 payızğa kedeylene tüsken. Qala köşelerine şıqqan beybit twrğındar da bilikten Yemen, Süriya men Iraktağı qaqtığıstarğa jwmsalıp jatqan qıruar qarjını Iran azamattarınıñ kün köris deñgeyin köteruge jwmsaudı talap etti.

2015 jılı Irannıñ Prezidenti  Hasan Rouhani älem basşılarımen yadrolıq bağdarlama boyınşa kelisimge qol qoyğannan keyin küşin joyğan sankciyalar eldiñ ekonomikasın köteredi dep uäde etken bolatın. Wlttıq ekonomika recessiyadan şığıp, inflyaciya tömendegenimen, käsipkerlikke keletin şeteldik investiciya qısqardı. Qazir Irandağı jwmıssızdıq deñgeyi 12,4 payızdı qwraydı.

“The Qazaq Times”