يراننىڭ بىرنەشە قالاسىندا ۇكىمەتكە قارسى نارازىلىق شەرۋلەرى باستالدى

يراننىڭ سولتۇستىگىندەگى رەشت، باتىسىنداعى كەرمانشاح قالالارىندا باستالعان ۇكىمەتكە قارسى نارازىلىق شەرۋلەرى، يسفاحان، حامادان سياقتى شاعىن ايماقتاردا جالعاسىن تاپتى. قوعامدىق قارسىلىق شاراسى باعالاردىڭ ءوسۋىن سىناپ، ءدىني قىزمەتكەرلەردىڭ  بيلىگىن، سىرتقى ساياساتقا ەسەپسىز قارجى جۇمسالۋىن ايىپتادى. بۇل - يراندا 2009 جىلى سايلاۋ قورىتىندىلارىمەن كەلىسپەگەن حالىقتىڭ قارسىلىق شەرۋىنەن كەيىن قايتالانىپ وتىرعان ەكىنشى نارازىلىق اكتسياسى.

ۆۆس تىلشىلەرى ء"دىن قىزمەتكەرلەرى وزدەرىن قۇداي سياقتى ۇستايتىن بولدى" دەگەن ۇرانداردىڭ بولعانىن حابارلادى. رۋحاني باعىتتاعى باسشىلاردىڭ ارەكەتىن قۇپتامايتىندار ءدىني قىزمەتكەرلەردىڭ ەڭ كوپ بولىگى شوعىرلانعان كۋما قالاسىنان دا تابىلدى.

حالىق سانى جونىنەن ەڭ كوپ ادامدار توبىن جيناعان نارازىلىق شەرۋى ماشاد قالاسىندا ءوتىپ، وندا 52 ازامات تۇتقىندالعان. تەھران قالاسىندا دا بىرنەشە ادامنىڭ ۇستالعانى بەلگىلى بولدى. ەل استاناسىنىڭ قاۋىپسىزدىك قىزمەتىنە جاۋاپتى تۇلعا اباقتىعا جابىلعاندار ورتالىق الاڭعا جينالعان  شاقتى ادامنىڭ اراسىندا بولعانىن جاريالادى. وسىدان الدىن تەھران قالاسىنىڭ باسشىسى پوليتسيا  باستى الاڭداعى حالىقتىڭ كەز كەلگەن شوعىرىن تاراتۋعا قۇقىلى ەكەنىن ەسكەرتكەن ەدى.

نارازىلىق شەرۋىن ۇيىمداستىرۋشىلار حالىقتى قارسىلىق اكتسياسىنا الەۋمەتتىك جەلىلەر ارقىلى شاقىرعان. Facebook-تە كەرمانشاحتاعى قاۋىپسىزدىك كۇشتەرى مەن بەيبىت تۇرعىنداردىڭ قاقتىعىسى كورسەتىلگەن بەينەجازبا جاريالاندى. حالىقتىق قارسىلىق ءبىر اپتانىڭ ىشىندە جۇمىرتقا باعاسى ەكى ەسە وسكەننەن كەيىن، مەملەكەت باسشىسىنىڭ ماسەلەنى قاداعالاي الماي وتىرعانىنا نارازىلىقتان باستالعان. ءار قالادا جينالعان ازاماتتار ءارتۇرلى تالاپتاردى العا تارتتى. جوعارىدا اتالعان سەبەپتەردەن بولەك، الاڭعا شىققانداردىڭ قاتارىندا ساياسي تۇتقىنداردى بوساتۋدى سۇراعاندار دا بار.

رەۆوليۋتسيالىق گۆارديا مەن بىرنەشە بارلاۋ اگەنتتىكتەرى حالىقتى قاتاڭ باقىلاۋدا ۇستايتىن يراندا نارازىلىق شەرۋلەرى ءجيى بوي كورسەتەتىن قۇبىلىس ەمەس. دەگەنمەن وسى اپتانىڭ بەيسەنبىسىنەن باستاپ جالعاسىپ كەلە جاتقان قارسىلىقتار حالىقتىڭ ەلدەگى ەكونوميكالىق جاعدايدىڭ كۇرت تومەندەۋى مەن قازىرگى بيلىكتىڭ كوپ ارەكەتىن قۇپتامايتىنىن كورسەتەدى. ۆۆس-ءدىڭ زەرتتەۋىنە سايكەس، يراندىقتار سوڭعى 10 جىلدا 15 پايىزعا كەدەيلەنە تۇسكەن. قالا كوشەلەرىنە شىققان بەيبىت تۇرعىندار دا بيلىكتەن يەمەن، ءسۇريا مەن يراكتاعى قاقتىعىستارعا جۇمسالىپ جاتقان قىرۋار قارجىنى يران ازاماتتارىنىڭ كۇن كورىس دەڭگەيىن كوتەرۋگە جۇمساۋدى تالاپ ەتتى.

2015 جىلى يراننىڭ پرەزيدەنتى  حاسان روۋحاني الەم باسشىلارىمەن يادرولىق باعدارلاما بويىنشا كەلىسىمگە قول قويعاننان كەيىن كۇشىن جويعان سانكتسيالار ەلدىڭ ەكونوميكاسىن كوتەرەدى دەپ ۋادە ەتكەن بولاتىن. ۇلتتىق ەكونوميكا رەتسەسسيادان شىعىپ، ينفلياتسيا تومەندەگەنىمەن، كاسىپكەرلىككە كەلەتىن شەتەلدىك ينۆەستيتسيا قىسقاردى. قازىر يرانداعى جۇمىسسىزدىق دەڭگەيى 12,4 پايىزدى قۇرايدى.

“The Qazaq Times”