Foto: Vedomosti

Qazaqstan 2018 jılı da Reseyden keletin kölikterge tıyım salu turalı şeşimin küşinde qaldıradı. Bwl turalı "Kolesa" portalı habarladı. 

Sayttıñ mälimetinşe, soñğı kezderi  äleumettik jelilerde 2018 jıldıñ 1 qañtarınan bastap Euraziyalıq ekonomikalıq odaqtıñ Keden kodeksi öz küşine engennen keyin Resey jäne basqa elderdegi kölikterdi ekologiyalıq klası men türli talaptarğa qaramastan  Qazaqstanğa äkeluge bolatını turalı qaueset tarağan.

2015 jıldıñ 1 qañtarında Euraziyalıq odaqtan keletin kölikterge salınatın qosımşa qwn salığı şettetilgennen keyin jäne  "Kölik qwraldarınıñ qauipsizdigi" turalı Kedendik odaqtıñ tehnikalıq reglamenti iske qosılğan soñ Reseyden keletin kölikter sanı köbeyip, Qazaqstannıñ avtosalondarında kölik satılımı azayıp ketken.

Mine, osıdan keyin QR Investiciyalar jäne damu ministrligi otandıq kölik öndirisin saqtap qalu maqsatında "Qazaqstan Respublikasınıñ avtomobil' joldarımen jüruge arnalğan avtokölik qwraldarınıñ jol beriletin parametrlerin bekitu turalı" №342 bwyrığın şığardı.

Qwjat boyınşa Evro-4 ekologiyalıq standartınan tömen klastağı kölikterdi  jäne bwğattauğa qarsı tejeu jüyesi, qauipsizdik jastığı, İSOĞİH bekitu jüyesi qwrılğılarımen qamtamasız etilmegen kölikterdi Qazaqstanğa äkeluge tıyım salınğan. Osı sebepti de EAEO-nıñ Kedendik kodeksi qabıldanğannan keyin de Reseyden kölik äkeluge qatıstı eşqanday özgeris bolmaydı.

Osılayşa portal "bwl mäsele zañ qayta talqılanbayınşa jabıq bolıp qaladı deuge boladı" dep mälimdep otır.

“The Qazaq Times”