Qıtaydağı qazaqtardıñ mäselesine baylanıstı ötinişterdiñ jiileuine oray, QR Sırtqı ister ministrligi Qazaqstan men Qıtay diplomatiyalıq vedomstvoları Qıtaydağı qazaqtardıñ mäselesin talqılau üşin jüyeli türde konsul'taciya ötkizip jatqandarın aytadı. Bwl turalı SİM-niñ resmi saytında jariyalandı.

Sırtqı ister ministrliginiñ saytında, «27 qaraşada QR Sırtqı ister ministriniñ orınbasarı Aqılbek Kamaldinov QHR Elşisi Çjan Han'hueymen kezdesti. Sonday-aq Qazaqstan Respublikası Sırtqı ister ministrliginiñ Konsuldıq qızmet departamenti jäne Astanadağı QHR Elşiliginiñ konsuldıq bölim basşılığımen qazaq diasporasına (QHR azamattarı) baylanıstı mäselelerdi şeşu jolındağı ıntımaqtastıq jönindegi konsul'taciyalar ötkizildi. 9 qaraşada Qazaqstan Respublikasınıñ Qıtaydağı Elşisi Şahrat Nwrışev QHR Sırtqı ister ministriniñ kömekşisi (vice-ministr) Li Hueylaymen kezdesti», – dep habarlandı.

Mälimdemede belgili bolğanday, Sırtqı ister ministriniñ birinşi orınbasarı Mwhtar Tileuberdi Ürimji qalasında biıl jıl soñına deyin saparlay barmaq. Sapar maqsatı Şınjañdağı Sırtqı ister basqarması basşılığımen kezdesu, sonımen birge QR SİM Pasport jäne vizalıq qızmet inspekciyasın jasau delingen. Al jeltoqsan ayında sırtqı ister ministriniñ orınbasarı Aqılbek Kamaldinov Beyjiñ qalasına saparlay barıp, Qıtaydağı qazaqtardıñ mäselesin qamtığan QR-QHR arasındağı Qauipsizdik salasındağı ıntımaqtastıq jönindegi kişi komitettiñ jäne eki el Sırtqı ister ministrlikter arasındağı sayasi konsul'taciyalar otırısın ötkizgeli otırğanı belgili boldı.

Bwdan sırt SİM jariyalağan mälimette, prezident Nwrswltan Nazarbaevtıñ tapsırmasımen şeteldegi qazaqtarğa qatıstı mäseleler QR Sırtqı ister ministrliginiñ negizgi kün tärtibine engenin atap aytadı. Älemdegi bir twtas qazaq deytin wlt üşin QR SİM-i jasap jatqan bwl qadamı quanarlıq is deuge boladı. Endi tek isiniñ önimi eldiñ kütken jerinen şığıp, dittegen isin tındırsa degen tilek pen ümit qatar artılmaq.

“The Qazaq Times”