Foto: KALEEM

Papua-Gvineyadağı qauipsizdik qızmetkerleri Joğarğı Sottıñ şeşimimen zañsız dep tanılğan bosqındar lageriniñ twrğındarınan atalğan aumaqtı bosatudı talap etti. Keşe lagerdi panalap qalğan bosqındarğa 1 sağat uaqıt bergen memleket ökilderi, ornınan tapjılmağan twrğındardı küştep şığarğan. Australiya özine  jetudi közdegen Afrika men Aziyadan köşken bosqındardı öz şekarasınan sırtqı aumaqta wstau üşin 2013 jıldan beri Manus aralındağı lagerdi qarjılandırıp keledi. Endi jergilikti bilik bosqındarğa pana bolğan mekendi jabu turalı şeşim şığardı. 

Bosqındar lageriniñ jay-küyi men onda bolıp jatqan soñğı jañalıqtardan bükil älemdi habardar etip otırğan tilşi Behrouz Boochani Äl-Jazira aqparattıq agenttigimen telefon arqılı tildeskennen keyin twtqınğa alındı. Qazir Australiyanıñ media qauımdastığı juırda ğana soñğı jıldardağı eñbegi üşin Amnesty International wyımınıñ sıylığın alğan jurnalistiñ bostandığı üşin küresip jatır.

Mel'burn universitetiniñ professorı Patrik Makgorri bosqındardı ornalastıru boyınşa jaña jospardıñ joqtığın, al onda jıldar boyı twrıp kele jatqan azamattar körgen teperişteri men qiın tağdırınıñ äserinen suicidke jaqın bolıp keletinin aytıp, olardıñ bolaşağına alañdauşılıq bildirdi.

Australiyanıñ Prem'er-ministri Papua-Gvineya biliginiñ äreketin qwptamaytının körsetip, "Olar bizge qısım körsetkisi keledi. Biz osıdan keyin bosqındardı öz jerimizge kirgizedi dep oylaydı. Biraq biz özimizdiñ migraciyalıq sayasatımızdı özgertpeymiz", - dedi.

Lager' resmi türde 31 qazan jabılğanımen, ondağı bosqındar üş aptağa juıq uaqıt boyı atalğan mekennen ketpey, qarsılıq körsetti. Policiyamen qaqtığıs barısında bosqındarğa küş körsetu faktileri tirkelgen. VVS-diñ soñğı jariyalağan aqparatında Kanberra Ükimeti bosqındardıñ basqa orınğa ornalastırılğanı aytılğan. BWW bosqındardıñ mäselesine alañdauşılıq bildirip, jaña mekende medicinalıq, sanitarlıq talaptar saqtalmağanın jetkizdi.

“The Qazaq Times”