فوتو: KALEEM

پاپۋا-گۆينەياداعى قاۋىپسىزدىك قىزمەتكەرلەرى جوعارعى سوتتىڭ شەشىمىمەن زاڭسىز دەپ تانىلعان بوسقىندار لاگەرىنىڭ تۇرعىندارىنان اتالعان اۋماقتى بوساتۋدى تالاپ ەتتى. كەشە لاگەردى پانالاپ قالعان بوسقىندارعا 1 ساعات ۋاقىت بەرگەن مەملەكەت وكىلدەرى، ورنىنان تاپجىلماعان تۇرعىنداردى كۇشتەپ شىعارعان. اۋستراليا وزىنە  جەتۋدى كوزدەگەن افريكا مەن ازيادان كوشكەن بوسقىنداردى ءوز شەكاراسىنان سىرتقى اۋماقتا ۇستاۋ ءۇشىن 2013 جىلدان بەرى مانۋس ارالىنداعى لاگەردى قارجىلاندىرىپ كەلەدى. ەندى جەرگىلىكتى بيلىك بوسقىندارعا پانا بولعان مەكەندى جابۋ تۋرالى شەشىم شىعاردى. 

بوسقىندار لاگەرىنىڭ جاي-كۇيى مەن وندا بولىپ جاتقان سوڭعى جاڭالىقتاردان بۇكىل الەمدى حاباردار ەتىپ وتىرعان ءتىلشى Behrouz Boochani ءال-جازيرا اقپاراتتىق اگەنتتىگىمەن تەلەفون ارقىلى تىلدەسكەننەن كەيىن تۇتقىنعا الىندى. قازىر اۋستراليانىڭ مەديا قاۋىمداستىعى جۋىردا عانا سوڭعى جىلدارداعى ەڭبەگى ءۇشىن Amnesty International ۇيىمىنىڭ سىيلىعىن العان ءجۋرناليستىڭ بوستاندىعى ءۇشىن كۇرەسىپ جاتىر.

مەلبۋرن ۋنيۆەرسيتەتىنىڭ پروفەسسورى پاتريك ماكگورري بوسقىنداردى ورنالاستىرۋ بويىنشا جاڭا جوسپاردىڭ جوقتىعىن، ال وندا جىلدار بويى تۇرىپ كەلە جاتقان ازاماتتار كورگەن تەپەرىشتەرى مەن قيىن تاعدىرىنىڭ اسەرىنەن سۋيتسيدكە جاقىن بولىپ كەلەتىنىن ايتىپ، ولاردىڭ بولاشاعىنا الاڭداۋشىلىق ءبىلدىردى.

اۋستراليانىڭ پرەمەر-ءمينيسترى پاپۋا-گۆينەيا بيلىگىنىڭ ارەكەتىن قۇپتامايتىنىن كورسەتىپ، "ولار بىزگە قىسىم كورسەتكىسى كەلەدى. ءبىز وسىدان كەيىن بوسقىنداردى ءوز جەرىمىزگە كىرگىزەدى دەپ ويلايدى. بىراق ءبىز ءوزىمىزدىڭ ميگراتسيالىق ساياساتىمىزدى وزگەرتپەيمىز", - دەدى.

لاگەر رەسمي تۇردە 31 قازان جابىلعانىمەن، ونداعى بوسقىندار ءۇش اپتاعا جۋىق ۋاقىت بويى اتالعان مەكەننەن كەتپەي، قارسىلىق كورسەتتى. پوليتسيامەن قاقتىعىس بارىسىندا بوسقىندارعا كۇش كورسەتۋ فاكتىلەرى تىركەلگەن. ۆۆس-ءدىڭ سوڭعى جاريالاعان اقپاراتىندا كانبەررا ۇكىمەتى بوسقىنداردىڭ باسقا ورىنعا ورنالاستىرىلعانى ايتىلعان. بۇۇ بوسقىنداردىڭ ماسەلەسىنە الاڭداۋشىلىق ءبىلدىرىپ، جاڭا مەكەندە مەديتسينالىق، سانيتارلىق تالاپتار ساقتالماعانىن جەتكىزدى.

“The Qazaq Times”