"Gülenşilerdiñ" jetekşisi Fethullah Gülen. Foto: parstoday.com.

AQŞ-ta twratın Fethullah Gülendi wrlap şığıp ketuge äreket etti degen mälimetti Ankara jaq teriske şığardı. Uaşingtondağı Türkiya elşiligi jasağan mälimdemede «bwl jaqınğı jıldardağı eñ ülken sayasi külkili is» dedi. Bwl turalı BBC-diñ resmi saytı habarladı.

Türkiya biligi Fethullah Gülendi 2016 jılğı iske aspay qalğan äskeri töñkeristi wyımdastıruşı dep ayıptap keledi. AQŞ-tağı Türkiya elşiliginiñ mälimetinde: «Ankara jaq Fethullahtı sot aldında jauap beru üşin AQŞ-tan Türkiyağa ekstradiciya jasaluın kütip otır», – dep mälimdep, Türkiya bwl qadamğa zañdı jolmen jetuge tırısıp otırğanın alğa tartuda.

Türik eliniñ basşısı Rejep Tayıp Erdoğan Gülendi ekstradiciyalau üşin birneşe ret äreket etip körgen. Alayda, AQŞ-tıñ Ortalıq barlau basqarmasınıñ bwrınğı jetekşisi Jeyms Ulsidiñ bergen mälimetine qarağanda Türkiya jaq naurız ayında Fethullah Gülendi wrlap ketudi josparlağan. Prezident Tramptıñ qauipsizdik jönindegi bwrınğı keñesşisi Mayld Flinn ötken jıldıñ qazan ayında Türkiya ükimetiniñ resmi ökilderimen Gülendi şığarıp ketu turalı aqıldasqan dep ayıptaluda. Tipti olar bwl operaciya üşin 15 mln AQŞ dolların audaruğa keliskeni turalı mälimet bar. Degenmen Maykl Flinn bwl aytılğandardı teriske şığarıp keledi.

AQŞ-tıñ tanımal basılımı «WSJ» bolsa, Maykl Flin men Türkiya ükimetiniñ ökilderi Gülendi jekelik wşaq arqılı Türkiyanıñ Imralı aralındağı türmege jetkizu turalı aqıldasqan boluı mümkin degendi jazadı. Atalğan basılımınıñ habarına qarağanda, bwl is Reseydiñ AQŞ-tağı prezident saylauına aralasu isin anıqtau kezinde belgili bolğan.

“The Qazaq Times”