Foto: https://www.com.tr

Süriyanıñ Idlib provinciyasında äue soqqısı saldarınan 33 türik sarbazı mert boldı. Türkiya tarabı qarımta şabuıl jasauı mümkin.

Oqiğadan keyin Türkiya prezidenti Rejep Tayıp Erdoğan qorğanıs ministrliginiñ basşıları, sırtqı ister ministri men Qarulı Küşteri Bas ştabınıñ ökilderimen şwğıl keñes otırısın ötkizdi. Türkiyanıñ Sırtqı ister ministri Mevlut Çavuşoglımen söylesken NATO Bas hatşısı Yens Stoltenberg «Biz Reseydiñ Süriya äskerine qoldau körsetip otıranın jaqsı bilemiz jäne Kreml'diñ bwl qadamın qoldamaymız. Aldağı uaqıtta jağday uşığıp ketpes üşin Resey şeginui tiis. NATO Türkiyağa qoldau bildiredi», – dedi.

Mälimetter boyınşa, sarbazdar Siriya ükimet küşteriniñ äue soqqısı saldarınan köz jwmğan. Degenmen jağdayğa qatıstı resmi Damask biligi qanday da bir aqparat tarqatqan joq. Soñğı aqpar boyınşa, türik biligi qarsı soqqığa köşken.

Aqpannıñ özinde Süriya armiyasınıñ artilleriyalıq şabuıldarınan 12 türik äskeri jäne bir azamatı qaza taptı. Bwğan jauap retinde Türkiya Süriyanıñ 115 ükimettik ğimarattarın nısanağa alıp, 101 süriyalıq jauıngerdiñ közin joyğanın ayttı. Bwl mäsele töñireginde AQŞ pen NATO Türkiyağa qoldau bildirip otır.

Idlib – oppoziciya baqılauındağı Süriyanıñ jalğız öñiri. Onda Damask biliginiñ rejimimen ömir sürgisi kelmeytin Süriyanıñ basqa öñirlerinen jinalğan 3,5 mln bosqın bar. Ankara Süriya oppoziciyasına äskeri qoldau körsetedi, al Resey ükimet küşterin qoldaydı. Süriyada reseylik äskeri kontingent ornalasqan. Resey VKS wşaqtarı süriyalıq aviaciyağa kömektesip, äskeri operciyalar jürgizip keledi.

"The Qazaq Times"