EKSPO qalaşığı. Foto: The MICE Agency

Turizm – qazirgi kezde üşinşi orındağı tabıs közi. Ol üşin är el ärtürli täsildermen eline turister şaqıradı. Aytalıq, Eyfel' mwnarası körgen jandı Franciyağa şaqırsa, Täj-Mahal Ündistanğa baruğa jeteleydi. Qıtay Qorğanı jılına neşe million şeteldikti Qıtayğa bastaydı. Osınıñ bäri sol eldiñ ekonomikasına tabıs äkeledi. Damığan elder azamattarınıñ älem aralauğa degen qwştarlığı ömiriniñ mañızdı bir bölşegi. Sayahat kartasına belgilengen tarihi orındar, tabiği körkem jerler, tau-özenderdi sayahattau arqılı ömirin qızıqqa tolı etuge tırısadı.

Älem aralağan sayahatşılardıñ ayağı Qazaqstanğa da jetip jatır. Turizmdi damıtu bizge mol ekonomikalıq kiris kirgizer edi, biraq, bwl bağıtta istelip jatqan jwmıstardıñ önimi biz oylağannan älde qayda tömen. 2017 jıl Qazaqstan üşin mañızdı turizm jılı bolmaq. Biılğı jılı ötetin EKSPO körmesi Qazaqstannıñ osığan deyingi turizmdi damıtudağı eñ ülken oray. Alayda, EKSPO körmesiniñ dabırası amerikalıqtar sanasındağı on jıl bwrınğı «Borat» kinosın şayıp kete alğan joq. Amerikalıq basılımdardağı Qazaqstan turizmı turalı taqırıptardı izdeseñiz, EKSPO-dan bwrın «Borat» kinosı söz boladı.

Bwl “The New York Times” basılımınıñ «2017 jılı sayahat kartañızda boluğa tiisti 52 jer» attı toptamasındağı Qazaqstan turalı bergen aqparatı.

«Qazaqstan osıdan on jıl ilgeri «Borat» fil'mi arqılı sizdiñ sayahat kartañızdan orın alğalı beri, Jibek jolındağı mañızdı turistik ayaldama boluğa tırısıp keldi. El ortalığı Astanada 2016 jılı aşılğan St. Regis jäne Ritc-Karltondardı qamtığan, joğarı därejeli qonaq üyler sanı köbeydi. Sonday-aq, mwnaylı el birte-birte ekologiyalıq turizmge qadam qoyıp keledi. Elordası Astana 2017 jılğı Bükilälemdik EKSPO körmesin ötkizuşi qala bolıp otır. Bwl is-şarada bolaşaqtağı energiya közderiniñ joldarın qarastıru maqsatında boladı. Atalğan şaranıñ bastı erekşeligi: körme ötetin orın jasıl energiyamen jabdıqtaladı. Sonımen qatar, 2016 jılı biologiyalıq türlerge bay Täñirtau (Tyan'-Şan') tau-suları Düniejüzilik mwralar tizimine alındı. Remote Lands、Intrepid Travel qatarlı turistik agenttik pen turistik marşruttar iske qosıldı», – delingen.

Tanımal basılım fototilşisiniñ közine külli Qazaqstan dalasınan äser etken körnisi tömendegidey bolsa kerek:

Almatıdağı şirkeu. Foto: Adam H. Graham for The New York Times

Biz qalay aqtalsaq ta, amerikalıqtardıñ sayahat kartasına «Borat» arqılı kirdik. Maqsat – Borattıñ dauın qoqsıtu emes. Tilek – EKSPO körmesine kelgen sayahatşılardıñ sanasınan Borattı joğalta alsaq bolğanı.

 

"The Qazaq Times"