ەكسپو قالاشىعى. فوتو: The MICE Agency

تۋريزم – قازىرگى كەزدە ءۇشىنشى ورىنداعى تابىس كوزى. ول ءۇشىن ءار ەل ءارتۇرلى تاسىلدەرمەن ەلىنە تۋريستەر شاقىرادى. ايتالىق، ەيفەل مۇناراسى كورگەن جاندى فرانتسياعا شاقىرسا، ءتاج-ماحال ۇندىستانعا بارۋعا جەتەلەيدى. قىتاي قورعانى جىلىنا نەشە ميلليون شەتەلدىكتى قىتايعا باستايدى. وسىنىڭ ءبارى سول ەلدىڭ ەكونوميكاسىنا تابىس اكەلەدى. دامىعان ەلدەر ازاماتتارىنىڭ الەم ارالاۋعا دەگەن قۇشتارلىعى ءومىرىنىڭ ماڭىزدى ءبىر بولشەگى. ساياحات كارتاسىنا بەلگىلەنگەن تاريحي ورىندار، تابيعي كوركەم جەرلەر، تاۋ-وزەندەردى ساياحاتتاۋ ارقىلى ءومىرىن قىزىققا تولى ەتۋگە تىرىسادى.

الەم ارالاعان ساياحاتشىلاردىڭ اياعى قازاقستانعا دا جەتىپ جاتىر. ءتۋريزمدى دامىتۋ بىزگە مول ەكونوميكالىق كىرىس كىرگىزەر ەدى، بىراق، بۇل باعىتتا ىستەلىپ جاتقان جۇمىستاردىڭ ءونىمى ءبىز ويلاعاننان الدە قايدا تومەن. 2017 جىل قازاقستان ءۇشىن ماڭىزدى تۋريزم جىلى بولماق. بيىلعى جىلى وتەتىن ەكسپو كورمەسى قازاقستاننىڭ وسىعان دەيىنگى ءتۋريزمدى دامىتۋداعى ەڭ ۇلكەن وراي. الايدا، ەكسپو كورمەسىنىڭ دابىراسى امەريكالىقتار ساناسىنداعى ون جىل بۇرىنعى «بورات» كينوسىن شايىپ كەتە العان جوق. امەريكالىق باسىلىمدارداعى قازاقستان تۋريزمى تۋرالى تاقىرىپتاردى ىزدەسەڭىز، ەكسپو-دان بۇرىن «بورات» كينوسى ءسوز بولادى.

بۇل “The New York Times” باسىلىمىنىڭ «2017 جىلى ساياحات كارتاڭىزدا بولۋعا ءتيىستى 52 جەر» اتتى توپتاماسىنداعى قازاقستان تۋرالى بەرگەن اقپاراتى.

«قازاقستان وسىدان ون جىل ىلگەرى «بورات» ءفيلمى ارقىلى ءسىزدىڭ ساياحات كارتاڭىزدان ورىن العالى بەرى، جىبەك جولىنداعى ماڭىزدى تۋريستىك ايالداما بولۋعا تىرىسىپ كەلدى. ەل ورتالىعى استانادا 2016 جىلى اشىلعان St. Regis جانە ريتتس-كارلتونداردى قامتىعان، جوعارى دارەجەلى قوناق ۇيلەر سانى كوبەيدى. سونداي-اق، مۇنايلى ەل بىرتە-بىرتە ەكولوگيالىق تۋريزمگە قادام قويىپ كەلەدى. ەلورداسى استانا 2017 جىلعى بۇكىلالەمدىك ەكسپو كورمەسىن وتكىزۋشى قالا بولىپ وتىر. بۇل ءىس-شارادا بولاشاقتاعى ەنەرگيا كوزدەرىنىڭ جولدارىن قاراستىرۋ ماقساتىندا بولادى. اتالعان شارانىڭ باستى ەرەكشەلىگى: كورمە وتەتىن ورىن جاسىل ەنەرگيامەن جابدىقتالادى. سونىمەن قاتار، 2016 جىلى بيولوگيالىق تۇرلەرگە باي ءتاڭىرتاۋ (تيان-شان) تاۋ-سۋلارى دۇنيەجۇزىلىك مۇرالار تىزىمىنە الىندى. Remote Lands、Intrepid Travel قاتارلى تۋريستىك اگەنتتىك پەن تۋريستىك مارشرۋتتار ىسكە قوسىلدى»، – دەلىنگەن.

تانىمال باسىلىم ءفوتوتىلشىسىنىڭ كوزىنە كۇللى قازاقستان دالاسىنان اسەر ەتكەن كورنىسى تومەندەگىدەي بولسا كەرەك:

الماتىداعى شىركەۋ. فوتو: Adam H. Graham for The New York Times

ءبىز قالاي اقتالساق تا، امەريكالىقتاردىڭ ساياحات كارتاسىنا «بورات» ارقىلى كىردىك. ماقسات – بوراتتىڭ داۋىن قوقسىتۋ ەمەس. تىلەك – ەكسپو كورمەسىنە كەلگەن ساياحاتشىلاردىڭ ساناسىنان بوراتتى جوعالتا الساق بولعانى.

 

"The Qazaq Times"