Foto: bbc.com

Venesuelada säuir ayınan beri jalğasıp kele jatqan sayasi dağdarıs, oppoziciya men bilik arasındağı teke-tires elge jaña ekonomikalıq sankciyalar, älem narazılığı men işki twraqsızdıqtı alıp keldi. Äleumettik jağdaydıñ tömendeui el işindegi qılmıs pen zorlıq-zombılıqtıñ artuına sebep bolıp otır. VVS tilşisi Karakasta twratın venesuelalıq qariyalarmen bolğan äñgimesi arqılı bükil memlekettegi jağdaydı sipattap jazadı. 

Izabel' Dubuk - 87 jastağı zeynetker. Ol öziniñ 66 jastağı qızı Karispen birge twradı. Qalğan balaları men nemereleri Europa men Amerikağa qonıs audarğan. Soñğı wlı Venesueladağı dağdarıs şielenispey twrıp, birneşe ay bwrın Otanınan izin suıtıptı. Qart ana balalarınıñ beybitşilik ornağan,  ömir sapası joğarı elderge ketip ülgergenine quanadı.

1952-1958 jıldarı Venesuelanı basqarğan diktator Peres Himenestiñ közin körgen äjey, qatañ basşınıñ twsında da mwnday qiındıqqa wşıraspağanın aytadı. "Biz kün ötken sayın öz üyimizdiñ qabırğasına türmege jabılğanday twtqın bola bastadıq. Üyden tek dükenge ne jwmısqa şığamız. Asa mañızdı sebeppen bolmasa, köşege erkin şığu öte qauipti. Esikterimizge berik qwlıptar ornattıq", - deydi.

Ükimet eldegi qılmıs statistikasın jariyalaudı toqtatqannan keyin, 2016 jılı Venezuelan Violence Observatory qoğamdıq wyımı 28 mıñ 479 adam zorlıqpen öltirilgenin habarlağan bolatın. Bwl är 100 mıñ twrğınnıñ 92-si degen söz.

Bütin ğwmırın äue biletterin tekseruşi qızmetine arnağan Karis zeynetke şıqqan soñ, ağılşın tilin oquğa bel baylağan. Ol ağılşın tilinde söyleytin elderge sayahattaudı arman etedi. Biraq Venesuelada kelesi jılı 2,300% şarıqtaydı dep kütilgen inflyaciyamen şet elge şığu asa qımbatqa tüsetinin aytudıñ özi artıq. Öziniñ qarttığı osınday auır äri köñilsiz bolatının eşqaşan oyğa almağanın jetkizgen qariyalar auır kürsinip qoydı.

Izabel' öz ata-anasınıñ qarttıq şağı balalarınıñ ortasında qamsız äri baqıttı ötkenin sağınışpen eske aladı. "Bizdiñ qarttıq şağımızdıñ berekesi qaştı", - deydi ol.

“The Qazaq Times”