AQŞ Venesuela prezidenti Nikolas Maduronıñ demokratiyanı janıştau äreketterine qoldau körsetti degen ayıppen qıtaylıq China Electronics import jäne eksport korporaciyasına sankciya saldı. AQŞ Qarjı ministrligi salğan sankciya 30 qaraşa, düysenbi küni resmi küşine endi.

AQŞ Qarjı ministrligi jasağan mälimdemede atalğan qıtaylıq kompaniya Maduronıñ rejimine «Internet qızmetin şekteu, sandıq baqılau jürgizu jäne sayasi qarsılastarına qarsı kiber operaciyalardı jürgizuge» qoldau körsetken. Sonday-aq, mälimdemede: «Amerika Qwrama Ştattarı Venesuela ğana emes, bükil älemdegi adamdardıñ demokratiyalıq erik-jigerin basuğa kömektesetinderge qarsı şara qoldanuğa dayın», – delingen.

Degenmen, keşe Qıtay SİM tarabı AQŞ-tıñ bwl äreketine qatañ jauabı dayın ekenin körsetti. QHR SİM ökili Hua Çüniñ mälimdemesinde: «Venesuela ükimetiniñ resmiligin kez-kelgen üşinşi tarap anıqtauğa tiisti emes. Venesuela ükimeti men halqınıñ öz problemaların şeşuge öz mümkindikteri men parasattarı jetedi. Biz Venesuela halqınıñ damu jolın özgertu üşin birjaqtı sankciyalardı paydalanuğa üzildi-kesildi qarsımız», – degen.

Qıtayğa qosa Venesuela SİM tarabı da AQŞ sankciyasın ayıptap mälimdeme jasadı. «AQŞ sankciyası zañsız. Olardıñ maqsatı Venesuelanı oqşaulau jäne venesuelalıqtarğa qiındıq tudıru», – delingen Venesuela Sırtqı ister ministrliginiñ mälimdemesinde.

Qazirşe, China Electronics import jäne eksport korporaciyası sankciyağa baylanıstı eşqanday tüsinikteme bergen joq. Biraq, Qıtay Sırtqı ister ministrligi otandıq kompaniyalardıñ qwqığın qorğau üşin barlıq şaralardı jasaytının aytqan.

Venesuela azamattarı bwğan deyin eldegi keybir oppoziciyalıq közqarastağı basılımdardıñ, arnalardıñ sayttarına kire almaytındarın, jelilerdiñ jii bwğattalatının aytıp kelgen bolatın.

 

“The Qazaq Times”