الماتى قالاسىندا «ەر جانىبەك» حالىقارالىق قوعامدىق قورىنىڭ ۇيىمداستىرۋىمەن شاعىن فۋتبولدان وتكەن ءداستۇرلى «ER JANIBEK CUP-2017» حالىقارالىق ءتۋرنيرى مارەسىنە جەتتى. بيىلعى تۋرنير بەلگىلى عالىم، فيلولوگيا عىلىمدارىنىڭ دوكتورى، پروفەسسور تۇرسىنبەك كاكىشەۆتىڭ 90 جىلدىق مەرەيتويىنا ارنالدى.

ويىننىڭ ءبىرىنشى كۇنگى قورىتىندىسى بويىنشا، ەكىنشى كەزەڭگە "قازاق ستامبۇل" (تۇركيا), ء"امىر" (رەسەي، ساراتوۆ قالاسى), "بايولكە" (موڭعوليا), "داستان" (يران), "NFC Kazakhstan پاۆلودار" (قازاقستان، پاۆلودار), "بىرلىك-كەرۋەن" (الماتى),  "عافۋر" (الماتى), "الاتاۋ" (الماتى) فۋتبول كوماندالارى (فك) جولداما الدى.

"بىرلىك كەرۋەن" مەن "NFC Kazakhstan پاۆلودار" اراسىنداعى ويىن. فوتو: QT

ەكىنشى كۇنگى ويىندا  جارتىلاي فينالدا "NFC Kazakhstan پاۆلودار" مەن "امىر" ويناپ، 4:1 ەسەبىمەن  "NFC Kazakhstan پاۆلودار" فينالعا شىقتى. ال "بىرلىك-كەرۋەن" مەن "بايولكە" اراسىندا بولعان ويىندا 6:1 ەسەبىمەن "بىرلىك-كەرۋەن" فينالعا ءوتتى.

ءۇشىنشى ورىنعا تالاستا ء"امىر" فك "بايولكە" فك-نى جەڭىپ، 300 مىڭ تەڭگەنى قانجىعاسىنا بايلادى. ال "بايولكە" فك-نا 200 مىڭ تەڭگە سىياقى بەرىلدى.

ال فينالعا شىققان "بىرلىك كەرۋەن" مەن "NFC Kazakhstan پاۆلودار" اراسىنداعى ويىن 3:2 ەسەبىمەن اياقتالىپ، «ER JANIBEK CUP-2017» حالىقارالىق ءتۋرنيرىنىڭ كۋبوگىنە جانە 1 ملن تەڭگە قارجىلاي سىياقىعا "بىرلىك كەرۋەن" فك-سى يە بولدى.  "NFC Kazakhstan پاۆلودار"  كومانداسىنا 500 مىڭ تەڭگە سىياقى بەرىلدى.

جەڭىسكە جەتكەن "بىرلىك كەرۋەن" فك جانە ءتۋرنيردى ۇيىمداستىرۋشىلار. فوتو: QT

ء"بىز بۇل تۋرنيرگە كوپ دايىندالدىق. بىلتىر قاتىسىپ ەسەمىزدى جىبەرىپ العان ەدىك. ال بيىل ۇتتىق. ءبارى جىگىتتەردىڭ كۇش-جىگەرى. ال تۋرنير جوعارى دەڭگەيدە ءوتتى. بۇرىن تەك شەتەلدەن كەلگەن قازاقتار اراسىندا وتەتىن. بيىل جەرگىلىكتى كوماندالار قوسىلىپ وتىر. وسى سەبەپتى دە تۋرنير قىزىقتى ءوتتى", - دەدى جەڭىسكە جەتكەن "بىرلىك كەرۋەن" فك-نىڭ نەگىزىن قۇرۋشى مانات ماعاز.

«باقكەلدى — 2012» جشس-ءنىڭ ديرەكتورى، كاسىپكەر تولقىن اقانۇلى كۋبوك جۇلدەسىن تاعايىندادى. فوتو: QT

سونداي-اق، 4 ورىن العان "بايولكە" كومانداسىنا عىلىمحان قاليۇلى، 3 ورىن العان "امىرگە" سىرىمبەك تاۋ، 2 ورىن العان "NFC Kazakhstan پاۆلودار" كومانداسىنا ايسا ورازحان سىيلىقتار تابىستادى.

بۇدان بولەك،  «ەر جانىبەك» حالىقارالىق قوعامدىق قورىنىڭ تاعايىنداۋىمەن ۇزىك ويىن كورسەتكەن "NFC Kazakhstan پاۆلودار" فك-نىڭ ويىنشىسى اسقار اجيكوۆ "سۇرمەرگەن", "قازاق ستامبۇل"  فك-نىڭ ويىنشىسى جانەر احمەت بوزقۇرت "ۇزدىك شابۋىلشى", ء"امىر" فك-نىڭ قاقپاشىسى رۋسلان ماشتاكوۆ "ۇزدىك قاقپاشى" جانە "نامىس" فك-نىڭ (رەسەي، ومبى) ويىنشىسى نۋراحمەت نيگمانوۆ "ۇزدىك قورعاۋشى" نوميناتسيالارىن جەڭىپ الدى.

"NFC Kazakhstan پاۆلودار" فك-نىڭ ويىنشىسى اسقار اجيكوۆ "سۇرمەرگەن" نوميناتسياسىنا يە بولدى. فوتو: QT

سونداي-اق، تۇرسىنبەك كاكىشەۆ اتىنداعى ارنايى "ەلدىك رۋح" سىيلىعى فرانتسيادان كەلگەن "Parij Kazakh sport" فك-عا جانە قىرعىزستاننان كەلگەن "الاش" فك-عا بەرىلدى.

قىرعىزستاننان كەلگەن "الاش" فك- جەتەكشىسى ە.بۋلەكباەۆ "ەلدىك رۋح" سىيلىعىن الدى. فوتو: QT

الىستان ات ارىتىپ كەلگەن قازاق كوماندالارى ءتۋرنيردىڭ جابىلۋ سالتاناتىندا قوعامدىق قورعا جانە ۇيىمداستىرۋشىلارعا راحمەتىن ايتتى.

"بار ءومىرىن قازاق ادەبيەتىنە ارناعان تۇرسىنبەك كاكىشەۆتىڭ 90 جىلدىعىنا ارنالعان "ەر جانىبەك" حالىقارالىق قورىنىڭ فۋتبول ءتۋرنيرى قۇتتى بولسىن. ءبىزدى "شەتەلدەگى قانداستارىمىز" دەپ باۋىرىنا باسىپ جاتىر. سوندىقتان فرانتسيا قازاقتارى اتىنان وسى شارانى ۇيىمداستىرۋعا ات سالىسقان بارلىق ازاماتتارعا العىس ايتامىز", - دەدى پاريجدەگى قازاق مادەني ورتالىعىنىڭ جانە "Parij Kazakh sport" فك جەتەكشىسى تابارىك دوولۋ.

"بۇگىنگى ويىن وتە ادەمى بولدى. ويىن ءادىل، ءساتتى وتتى. ءتۋرنيردى ۇيىمداستىرعان اعالارىمىزعا العىسىمىز شەكسىز. ەندى كەلەسى جىلى ۇيىمداستىرىلسا، بۇدان دا جاقسى ويىن كورسەتۋگە تالپىنامىز", - دەدى  مونعوليادان كەلىپ، 4 ورىن العان "بايولكە" فك-نىڭ كاپيتانى ەرتىس بولاتۇلى.

موڭعوليادان كەلگەن "بايولكە" فك. فوتو: QT

جەڭىماز كومانداعا كۋبوك تاپسىرعان "ەر جانىبەك" حالىقارالىق قوعامدىق قورىنىڭ پرەزيدەنتى جەڭىس تۇركيا ءسوز سوڭىندا بارلىق قاتىسۋشى كوماندالارعا العىسىن ءبىلدىردى.

"بۇگىن "ەر جانىبەك" قورىنىڭ حالىقارالىق ءتۋرنيرى  قازاقتىڭ عالىمى، ابىزى تۇرسىنبەك كاكىشەۆ اعامىزدىڭ 90 جىلدىعىنا ارنالىپ وتىر. الىستان ات ارىتىپ، وسىنداي تۋرنيرگە قاتىسۋعا كەلگەندەرىڭىز ءۇشىن شەكسىز راحمەت ايتامىن. كەلەسى تۋرنيردە كەزدەسكەنشە", - دەپ تۇيىندەدى جەڭىس تۇركيا.

"ەر جانىبەك" حالىقارالىق قوعامدىق قورىنىڭ پرەزيدەنتى جەڭىس تۇركيا "بىرلىك كەرۋەن" فك-عا تۋرنير كۋبوگىن تابىستادى. فوتو: QT

ايتا كەتەيىك، «ER JANIBEK CUP-2017» حالىقارالىق ءتۋرنيرى 21 قازان كۇنى باستالعان. جارىسقا شەتەلدەن كەلگەن "قازاق ستامبۇل" (تۇركيا), امىر" (رەسەي، ساراتوۆ قالاسى), ء"ۇشتاس" (قىتاي، بەيجىڭ) "Parij Kazakh sport" (فرانتسيا، پاريج), "نامىس" (رەسەي، ومبى قالاسى), "بايولكە" (موڭعوليا), "الاش" (قىرعىزستان), "داستان" (يران) كوماندالارى جانە قازاقستاننان  كوماندالارى، سونداي-اق، الماتى قالاسىنان  "بىرلىك-كەرۋەن", "ساۋىر", "ەرەنتاۋ", "ۇشقوڭىر", "بەسقالا", "بارىس", "الاتاۋ", "عافۋر" كوماندالارى قاتىستى.

تۋرنيردە تۇسىرىلگەن فوتوcۋرەتتەردى مىنا سىلتەمەدەن الۋعا بولادى.

“The Qazaq Times”