Kovidtik brigadanıñ köligin juıp-şayıp jatqan, biraq qaterli jwmısına üstemaqı tölenbeytin sanitar qızmetker. Almatı qalasınıñ №6 jedel-järdem qızmeti stanciyası. 14 şilde 2021 jıl. Foto: QT / Kültegin Aspanwlı

Almatı qalasında törtinşi tolqın qaupi seyiler emes, tap qazir 19 mıñnan asa adam emdelip jatır. Qazir rezervtegi tösek-orındardı qosa eseptegende stacionarlarda 67% orın tolğan.

Qoğamdıq densaulıq saqtau basqarmasınıñ mälimetinşe, ötken täulikte tirkelgen 1517 adamnıñ 1429-ı simptom belgilerimen, tağı 88 adam simptomsız türde tirkelgen. 16 tamızda 651 adam auruhanağa jatqızılğan. Bwl özge aylardağı körsetkişten äldeqayda joğarı.

Jalpı qalada sıyımdılığı 8910 orın bolatın infekciyalıq stacionarlarda 5963 adam emdelip jatır. Olardıñ arasında 195 bala tösekke tañılğan. Al reanimaciya jäne qarqındı terapiya bölimderinde 430 nauqas jatır. 65 adam ÖJJ, 173 nauqas invazivti emes ÖJJ-ımen jäne 180 sırqat High flow apparatımen tınıstap jatır. Sonday-aq, BMSK men Telemedicina ortalığınıñ mobil'di toptarımen birge üy jağdayında 13 221 nauqas ambulatorlıq deñgeyde baqılauğa alınğan.

Resmi derekke qarağanda, Almatı qalasında biıl aqpannan beri 818 mıñ adam ekpeniñ alğaşqı, onıñ işinde 647 mıñı tolıq dozasın alğan. Äkimdik mälimetinşe, äzirge 160 egu punkti men 237 egu brigadasında 1028 medqızmetker jwmıs isteydi. Jalpı pandemiya bastalğalı qalada 130 mıñnan asa adam auırğan, onıñ 23 mıñnan astamı keyingi eki aptada anıqtalğan.

Epidahualdıñ naşarlauına baylanıstı qalıptı jağdaydağı 7011 tösek-orın 8910-ğa deyin köbeytilgen. Stacionarlardağı orın sanı artıp, tipti jaña rezervtik filialdar uaqıtşa iske qosılğan.

Jwmıs künderi küşeygen şekteumen istep, demalıs künderi jwmısın toqtatın türli wyım-mekemelerge qatıstı karantin rejimi 1 qırküyekke deyin wzardı.

Qoğamdıq densaulıq saqtau basqarmasınıñ baspasöz qızmeti QT redakciyasınıñ swrauımen koronavirus jwqqan sırqattardı emdeuge arnalğan tösek-orındar qorınıñ esebin wsındı:

  1. Ortalıq qalalıq klinikalıq auruhanada 700 orın bar.

Odan bölek filialdarı:

Qalalıq teri-venerologiyalıq dispanserinde 30;

«A-class Medical» medortalığında 80;

«Astana International» qonaq üyinde 240 orın dayındalğan.

  1. Almatı qalalıq Jedel şwğıl kömek körsetu auruhanasında tösek qorı jüzge artıp, jalpı sanı 400-ge jetti.

Filialdarı:

«Oqu-klinikalıq ortalığında»  JŞS 130;

«HAQ» medicinalıq ortalığında 150 orın äzir twr.

  1. I.Jekenova atındağı jwqpalı aurular auruhanasında (Degdar köşesi, 10/2) 540;

«Qalalıq revmatologiyalıq ortalıqta» 80;

«Medicinalıq kömek ortalığında» JŞS 125;

S. Asfendiyarov atındağı QazWMU jaña jataqhanası bazasında 520 tösek-orın jüktemesi qamtamasız etildi.

  1. «Ftiziopul'monologiya ortalığına» qarastı «Halıq arena» filialında 1000 tösek-orınğa şaqtalğan stacionar jwmıs istep keledi.

Tuberkulezge qarsı dispanserinde 100;

  1. Qalalıq №4 köpsalalı auruhanada 60;

Gumanitarlıq-pedagogikalıq kolledjiniñ jataqhanasınıñ bazasında 300 orın qwrılğan.

  1. «Qalalıq kardiologiyalıq ortalığı» jürek-qantamır jüyesi auruları bar KVI infekciyasın jwqtırğan nauqastardı emdeu üşin jwqpalı aurular auruhanasına auıstırıldı.

«Astra» qonaq üyinde 160 orın bar.

  1. WOS mügedekterine arnalğan gospitalinde 100 orın dayındalğan.

Osığan deyin bas sanitar däriger Jandarbek Bekşin bir künde auruhanağa jatqızılğandar sanı 500-den assa, qalada lokdaun küşeytilip, blok-beket qoyılatını turalı naurız ayındağı kriteriydiñ qazir küşin joyğanın mälimdegen.

Bekşinniñ boljauınşa, şilde ayında bastalğan törtinşi tolqınnıñ şarıqtau şegi 11-12 tamız künderi ötui kerek bolğan. Degenmen äli de Almatı qalası respublikadağı eñ ülken indet oşağı retinde täuligine 1,5 mıñnan kem emes jağday tirkelip jatır.

The Qazaq Times