Foto: Kapital.kz

«Qazaqstannıñ Twrğın üy qwrılıs jinaq banki» AQ («Bäyterek» holdinginiñ enşiles wyımı)  1-jartıjıldıqtağı jwmıs nätijeleri boyınşa esepti jariyaladı. Eseptik kezeñde Twrğın üy qwrılıs jinaq bankiniñ depozit bazası jıl basınan beri 14%-ğa artqan. Bwl turalı banktiñ baspasöz qızmeti habarladı. 

TÜQJB halıqtıñ wzaq merzimdi salımı narığında 1-orında twr. Jinaq aqşasınıñ jalpı kölemi 464 mlrd teñgege nemese ekinşi deñgeyli bankter arasında jalpı depozit qorjınınıñ 28%-na teñ.

Twrğın üy qwrılıs jinaq bankiniñ Basqarma Törayımı Läzzat Ibragimovanıñ sözinşe, körsetkişterdiñ jaqsaruına halıqtıñ twrğın üy jinaq qwrılıs jüyesine degen seniminiñ artuı jäne 2017 jıldıñ säuir ayındağı twrğın üy jinaq qwrılısı turalı kelisim-şarttar bekitudegi komissiyanıñ alınıp tastaluı ıqpal etken.

Osı jıldıñ törtinşi ayında 58 390 adam jaña depozit aşqan, al 2016 jıldıñ balama kezeñinde bwl körsetkiş 20 310-ğa teñ bolğan. Jalpı alğanda birinşi jartıjıldıqtıñ nätijesi boyınşa TÜQJB-da 201 523 jaña kelisim-şart aşıldı. Bwl 2016 jıldıñ alğaşqı 6 ayımen salıstırğanda eki ese derlik köp.

Eseptik kezeñ işinde Qazaqstandağı twrğın üy qwrılısı men baspana satıp aluğa berilgen zaemdar kölemi 155 mlrd teñgeni qwradı, onıñ 117 milliard teñgesin TÜQJB bölip otır. Bwl bükil el boyınşa resimdelgen barlıq ipotekalıq zaemdardıñ 75,4%-na teñ.

"Twrğın üy qwrılıs jinaq banki wsınatın nesielerge degen mwnday swranıstıñ qalıptasuına ekinşi deñgeyli bankter belsendiliginiñ halıqtı nesielendiru narığındağı birqalıptı ğana damuı, jıljımaytın mülik bağasınıñ twraqtaluı jäne «Nwrlı jer» memlekettik bağdarlamasınıñ jüzege asırıluı äser etti", - delingen baspasöz habarlamasında.

TÜQJB nesie qorjını 14,2%-ğa artıp, 6 ay qorıtındısı boyınşa 377,3 mlrd teñgeni qwradı. Twrğın üy qwrılıs jinaq bankiniñ NPL-ı (tölenbegenine 90 künnen astam uaqıt ötip ketken zaemdar) 0,41%-dı qwraydı.

“The Qazaq Times”