فوتو: Kapital.kz

«قازاقستاننىڭ تۇرعىن ءۇي قۇرىلىس جيناق بانكى» اق («بايتەرەك» حولدينگىنىڭ ەنشىلەس ۇيىمى)  1-جارتىجىلدىقتاعى جۇمىس ناتيجەلەرى بويىنشا ەسەپتى جاريالادى. ەسەپتىك كەزەڭدە تۇرعىن ءۇي قۇرىلىس جيناق بانكىنىڭ دەپوزيت بازاسى جىل باسىنان بەرى 14%-عا ارتقان. بۇل تۋرالى بانكتىڭ ءباسپاسوز قىزمەتى حابارلادى. 

تۇقجب حالىقتىڭ ۇزاق مەرزىمدى سالىمى نارىعىندا 1-ورىندا تۇر. جيناق اقشاسىنىڭ جالپى كولەمى 464 ملرد تەڭگەگە نەمەسە ەكىنشى دەڭگەيلى بانكتەر اراسىندا جالپى دەپوزيت قورجىنىنىڭ 28%-نا تەڭ.

تۇرعىن ءۇي قۇرىلىس جيناق بانكىنىڭ باسقارما ءتورايىمى ءلاززات يبراگيموۆانىڭ سوزىنشە، كورسەتكىشتەردىڭ جاقسارۋىنا حالىقتىڭ تۇرعىن ءۇي جيناق قۇرىلىس جۇيەسىنە دەگەن سەنىمىنىڭ ارتۋى جانە 2017 جىلدىڭ ءساۋىر ايىنداعى تۇرعىن ءۇي جيناق قۇرىلىسى تۋرالى كەلىسىم-شارتتار بەكىتۋدەگى كوميسسيانىڭ الىنىپ تاستالۋى ىقپال ەتكەن.

وسى جىلدىڭ ءتورتىنشى ايىندا 58 390 ادام جاڭا دەپوزيت اشقان، ال 2016 جىلدىڭ بالاما كەزەڭىندە بۇل كورسەتكىش 20 310-عا تەڭ بولعان. جالپى العاندا ءبىرىنشى جارتىجىلدىقتىڭ ناتيجەسى بويىنشا تۇقجب-دا 201 523 جاڭا كەلىسىم-شارت اشىلدى. بۇل 2016 جىلدىڭ العاشقى 6 ايىمەن سالىستىرعاندا ەكى ەسە دەرلىك كوپ.

ەسەپتىك كەزەڭ ىشىندە قازاقستانداعى تۇرعىن ءۇي قۇرىلىسى مەن باسپانا ساتىپ الۋعا بەرىلگەن زاەمدار كولەمى 155 ملرد تەڭگەنى قۇرادى، ونىڭ 117 ميلليارد تەڭگەسىن تۇقجب ءبولىپ وتىر. بۇل بۇكىل ەل بويىنشا رەسىمدەلگەن بارلىق يپوتەكالىق زاەمداردىڭ 75,4%-نا تەڭ.

"تۇرعىن ءۇي قۇرىلىس جيناق بانكى ۇسىناتىن نەسيەلەرگە دەگەن مۇنداي سۇرانىستىڭ قالىپتاسۋىنا ەكىنشى دەڭگەيلى بانكتەر بەلسەندىلىگىنىڭ حالىقتى نەسيەلەندىرۋ نارىعىنداعى بىرقالىپتى عانا دامۋى، جىلجىمايتىن مۇلىك باعاسىنىڭ تۇراقتالۋى جانە «نۇرلى جەر» مەملەكەتتىك باعدارلاماسىنىڭ جۇزەگە اسىرىلۋى اسەر ەتتى", - دەلىنگەن ءباسپاسوز حابارلاماسىندا.

تۇقجب نەسيە قورجىنى 14,2%-عا ارتىپ، 6 اي قورىتىندىسى بويىنشا 377,3 ملرد تەڭگەنى قۇرادى. تۇرعىن ءۇي قۇرىلىس جيناق بانكىنىڭ NPL-ى (تولەنبەگەنىنە 90 كۇننەن استام ۋاقىت ءوتىپ كەتكەن زاەمدار) 0,41%-دى قۇرايدى.

“The Qazaq Times”