Mañğıstau oblısındağı Qwrıq portınan Baku portına alğaşqı 1 mln tonna jük ötkizu şarası ötti. Bwl turalı Mañğıstau oblısı öñirlik kommunikaciyalar qızmetiniñ baspasöz qızmeti habarladı.

Şarağa Mañğıstau oblısınıñ äkimi Eralı Toğjanov, «QTJ» WK» AQ basşılığı, Äzirbayjan keme qatınası kompaniyasınıñ ökili jäne Qwrıq portınıñ eñbekkerleri men mıñnan asa belsendi jas qatıstı.

Şarada Qwrıq portınıñ bas direktorı M. Saqtağanov memleket basşısınıñ tapsırmasımen jüzege asırılıp jatqan Qazaqstannıñ Kaspiy teñizindegi porttardı keñeytu, elimizdiñ kölik-logistikalıq äleuetin damıtudıñ şaralarına toqtaldı.

Resmi mälimetter boyınşa porttağı bir million tonna jüktiñ 548 mıñ tonnası eksportqa şığarıldı. Importtıq jükter 452 mıñ tonnanı qwrap otır. Tağı bir tiimdi twsı atalmış infraqwrılımdar teñiz mañındağı qozğalıstı tört sağatqa jedeldetedi. Mäselen, Baku men Qwrıq arasındağı parommen jüru uaqıtı 18 sağattı qwraydı. Al, Aqtaudan Bakuge 22 sağat jiberedi.

Mañğıstau jerinen jöneltilgen jük Äzirbayjan, Gruziya porttarı arqılı Europağa qaray jol tartadı. Qwrıq parom keşenimen qazaqstandıq astıq, kömir, mwnay önimderi, tıñaytqış, himiyalıq önimder, tranzittik jükter, Qıtay, Qırğızstan jäne Özbekstannan şıqqan jükter eksportqa şığarıladı

“The Qazaq Times”