Foto: Ratel.kz

Qazaqstandağı şeneunikter özderine tapsırılğan mindetterdi dwrıs atqarmauı saldarınan benzin tapşılığı boldı.  Bügin QR Prem'er ministri Baqıtjan Sağıntaev ükimet otırısında "jauapkerşilik boluı kerek" ekenin aytıp, QR Energetika vice-ministri Äset Mağauovtı qızmetinen bosattı jäne Energetika ministri Qanat Bozımbaevğa sögis berudi wsındı. "QazMwnayGaz" wlttıq kompaniyasınıñ jetekşileri de jazasız qalmaydı. 

"Men kelesidey şeşim qabıldaymın. Birinşiden, Ükimet müşelerine qatıstı şeşimdi Prezident qabıldaydı. Men bügin Prezidentke Energetika ministri Qanat Bozımbaevqa sögis jariyalaudı wsınamın. Ekinşiden, vice-ministrler jwmısı mağan qatıstı. Sondıqtan Energetika vice-ministri Äset Mağauovtı qızmetinen bosatu turalı şeşim şığaramın", - dedi prem'er.

Al "QazMwnayGaz" wlttıq kompaniyası boyınşa Sağıntaev "Samwrıq-Qazına" AQ törağası Ömirzaq Şökeevke "QMG"AQ  basqarma törağasına sögis jariyalau şaraların qabıldau jäne atalğan kompaniya basşısınıñ orınbasarı Daniyar Berlibaevtı "mindetterin dwrıs atqarmağanı üşin" qızmetinen bosatu şaraların qarastıru turalı tapsırma berdi.

"Ömirzaq Estaywlı, qabıldanğan şaralar boyınşa meni habardar etip otırıñız", - dedi Sağıntaev.

Bwdan bölek, prem'er-ministr barlıq basşılar özderine senip tapsırılğan salalardıñ jağdayı boyınşa tolıq jauapkerşilikti moyındarına alatının jäne qol astındağılardıñ tüsiniktemelerin qabıldamaytının eskertti.

Ayta keteyik, qazan ayı bastalğalı beri Qazaqstanda mwnay önimderiniñ tapşılığına qatıstı daular köbeye bastadı. Bir apta bwrın ğana benzin bağası köterilip, qor jetkiliksiz ekeni aytılsa, endi kömir tapşılığı da bayqala bastadı. Keybir sarapşılar mwnı manipulyaciyamen baylanıstırıp otır.

“The Qazaq Times”