فوتو: Ratel.kz

قازاقستانداعى شەنەۋنىكتەر وزدەرىنە تاپسىرىلعان مىندەتتەردى دۇرىس اتقارماۋى سالدارىنان بەنزين تاپشىلىعى بولدى.  بۇگىن قر پرەمەر ءمينيسترى باقىتجان ساعىنتاەۆ ۇكىمەت وتىرىسىندا "جاۋاپكەرشىلىك بولۋى كەرەك" ەكەنىن ايتىپ، قر ەنەرگەتيكا ۆيتسە-ءمينيسترى اسەت ماعاۋوۆتى قىزمەتىنەن بوساتتى جانە ەنەرگەتيكا ءمينيسترى قانات بوزىمباەۆعا سوگىس بەرۋدى ۇسىندى. "قازمۇنايگاز" ۇلتتىق كومپانياسىنىڭ جەتەكشىلەرى دە جازاسىز قالمايدى. 

"مەن كەلەسىدەي شەشىم قابىلدايمىن. بىرىنشىدەن، ۇكىمەت مۇشەلەرىنە قاتىستى شەشىمدى پرەزيدەنت قابىلدايدى. مەن بۇگىن پرەزيدەنتكە ەنەرگەتيكا ءمينيسترى قانات بوزىمباەۆقا سوگىس جاريالاۋدى ۇسىنامىن. ەكىنشىدەن، ۆيتسە-مينيسترلەر جۇمىسى ماعان قاتىستى. سوندىقتان ەنەرگەتيكا ۆيتسە-ءمينيسترى اسەت ماعاۋوۆتى قىزمەتىنەن بوساتۋ تۋرالى شەشىم شىعارامىن", - دەدى پرەمەر.

ال "قازمۇنايگاز" ۇلتتىق كومپانياسى بويىنشا ساعىنتاەۆ "سامۇرىق-قازىنا" اق توراعاسى ومىرزاق شوكەەۆكە "قمگ"اق  باسقارما توراعاسىنا سوگىس جاريالاۋ شارالارىن قابىلداۋ جانە اتالعان كومپانيا باسشىسىنىڭ ورىنباسارى دانيار بەرلىباەۆتى "مىندەتتەرىن دۇرىس اتقارماعانى ءۇشىن" قىزمەتىنەن بوساتۋ شارالارىن قاراستىرۋ تۋرالى تاپسىرما بەردى.

"ومىرزاق ەستايۇلى، قابىلدانعان شارالار بويىنشا مەنى حاباردار ەتىپ وتىرىڭىز", - دەدى ساعىنتاەۆ.

بۇدان بولەك، پرەمەر-مينيستر بارلىق باسشىلار وزدەرىنە سەنىپ تاپسىرىلعان سالالاردىڭ جاعدايى بويىنشا تولىق جاۋاپكەرشىلىكتى مويىندارىنا الاتىنىن جانە قول استىنداعىلاردىڭ تۇسىنىكتەمەلەرىن قابىلدامايتىنىن ەسكەرتتى.

ايتا كەتەيىك، قازان ايى باستالعالى بەرى قازاقستاندا مۇناي ونىمدەرىنىڭ تاپشىلىعىنا قاتىستى داۋلار كوبەيە باستادى. ءبىر اپتا بۇرىن عانا بەنزين باعاسى كوتەرىلىپ، قور جەتكىلىكسىز ەكەنى ايتىلسا، ەندى كومىر تاپشىلىعى دا بايقالا باستادى. كەيبىر ساراپشىلار مۇنى مانيپۋلياتسيامەن بايلانىستىرىپ وتىر.

“The Qazaq Times”