Foto: forumdaily.com

Las Vegastağı qandı oqiğa sebepkeri Stiven Paddoktıñ jeke jazbası tabıldı. 59 adam qaza tauıp,  527 beybit twrğın jaralanğan qılmıstıq isti zertteumen aynalısıp jatqan policiya qızmetkerleriniñ mälimetinşe, qılmıskerdiñ qonaq üydegi bölmesinen tabılğan jazbada 32-qabattan halıq jinalğan alañğa bağıttalğan oqtıñ traektoriyası men qaşıqtığı eseptelgen. Bwl turalı CNN aqparattıq agenttigi jazdı. 

Arağa bir apta salıp, kün sayın qılmıstıñ jaña qırı aşılıp otırğanımen, qauipsizdik qızmetkerleri äli de zeynetkerlik jasındağı bwrınğı esepşiniñ qandıqol qılmıskerge aynaluınıñ sebebi men motivin anıqtay almay otır. CNN jurnalisi Wolf Blitzer zertteu isine qatısı bar Kevin C. McMahill -men bolğan swhbatınan kelesi qorıtındılar jasağan:

  • Stiven Paddoktıñ bölmesinde barlığı jaqsı ekenine köz jetkizu üşin köterilgen qonaq üydiñ küzet qızmetkeri ayağınan jaralanğan.
  • Stiven Paddoktıñ halıqaralıq terroristik wyımdarmen baylanısı rastalmadı.
  • Qılmıskerdiñ jalğız bolğanı kümän tudırmağanımen, qonaq üyde böten adam onıñ bölmesiniñ kiltin paydalanbağanı tekserilip, oqiğa bolğan jerde ornatılğan barlıq beynekameralar qaralğan. Stiven Paddoktıñ özinen bölek adamdarmen kezdeskeni ne olardıñ qonaq üyge kirip-şıqqanı tirkelmedi. Onıñ köpşiliktiñ üstinen oq jaudıru turalı josparınan ağası men azamattıq nekedegi äyeli habarsız bolıp şıqtı.

Stiven Paddok halıqtıñ üstinen oq jaudırmas bwrın, küzetşini jaralağan. Küzetşi keşki sağat 21:59 kezinde atılsa, halıqqa qarsı jasalğan qılmıs 22:01-de bastalıp, 10 minut boyı jalğasqan. Policiyanıñ jauap taba almay otırğanı - "Paddoktıñ oq atudı birden toqtatuına ne sebep boldı?" degen saual. Las Vegastıñ policiya oficeri Devid N'yuton CBS arnasındağı "60 minut" bağdarlamasında qonaqta bolıp, qılmıskerdiñ aldın ala qwrğan josparında "qaşıp ketu" degen bölim bolğan dep joramaldadı. On minuttıq şabuıldan soñ, oq atudı doğarğan qılmıskerdiñ köliginen tabılğan jarılğış zattar onıñ "tağı birneşe orında qandı oqiğa jasau turalı oyı bolğan" degen boljamğa alıp keledi.

“The Qazaq Times”