Qırğızstanda prezidenttik saylau jaqındağan sayın eldegi sayasi jağday uşığa tüsude. Oş oblısında Ömirbek Babanov jaqtastarın wrıp-soğu faktileri tirkelgen. Bwğan qosa Oş qalasınıñ äkimşiligi halıqtı Babanovpen kezdesuge barmauğa şaqırıp, agitaciyalıq jwmıstar jürgizilui tiis alañdı türli sıltaularmen bermey qoyğan. Bügin biz qırğız elinde prezident saylauı qarsañında bolıp jatqan osı jäne özge de oqiğalarğa qısqaşa toqtaludı jön kördik.

Qazan ayınıñ 3-i küni qırğızstandıq «NTS» telearnası Oş oblısında soqqığa jığılğan Ömirbek Babanovtıñ jaqtastarınıñ biri Durbek Älimjanov esimdi azamat jayında beynematerial körsetken. Onda Älimjanov qazan ayınıñ 1-i küni belgisiz 4 adamnıñ özin Qara-Su audanına qarastı Papan auılınıñ şetine aparıp, Ömirbek Babanovtan 100 mıñ dollar köleminde qarjı alğandığın moyındatu üşin wrıp-soqqandığı jayında aytqan. Keyinnen Älimjanovtıñ eşnärseni moyındamaytınına közderi jetken olar, oğan prezident saylauı ötkenşe Oş qalasında bolmauğa keñes bergen.

Soqqığa jığılğan Durbek Älimjanov.

Al Oş oblıstıq İşki ister departamenti baspasöz qızmeti atalmış oqiğağa baylanıstı BAQ ökilderiniñ saualına mardımdı jauap bermegen. Olardıñ sözinşe, Durbek Älimjanov osı uaqıtqa deyin bireuden jäbir körgeni jayında qwqıq qorğau organdarına şağım tüsirmegen. Almatmış oqiğa qırküyektiñ 28-i küni Oş qalasında ötken Ömirbek Bananovtıñ halıqpen kezdesuinen keyin eki künnen soñ bolğanın eskerse, onda onıñ ne sebepti tiisti organdarğa şağımdanbağanın tüsinuge boladı. Öytkeni däl osı Älimjanov bastağan Ömirbek Babanov jaqtastarınıñ agitaciyalıq jwmıstarı jürgizuine qırküyektiñ 28-i küni jergilikti bilik türli kedergiler jasağan. Mısalı: Babanovtıñ halıqpen kezdesui ötui tiis «Ämir Temir» audanındağı alañdı şahar äkimşiligi wyımdastıruşılarğa bermey qoyğan. Biraq Babanovtıñ saylau aldı ştabı kezdesudi däl osı audannıñ basqa jerinde ötkizgen. Mıñnan astam adam qatısqan kezdesude Babanov: «Men prezident bolğan küni elde adamnıñ wltına emes, onıñ täjiribesine qarap jwmısqa alatın boladı. Qırğız, özbek, qazaq, täjik barlığı teñ därejede boladı. Bizdiñ elimizdiñ baylığı – köp wlttılığında. Osı kezdesudi wyımdstıru barısında el biligi köptegen kedergiler jasadı. Adamdardı qorqıttı, ürkitti, wrdı-soqtı, bwlay kete berse arı qaray ne bolmaq ? «Tizerlep ömir sürgenşe, tik twrıp ölgenimiz artıq» barlığımız birigip eldi özgerteyik» - degen.

Oş qalalıq äkimşiliginiñ aldına Ömirbek Babanovqa qarsı qarsılıq akciyasına şıqqan halıq.

Osı kezdesuden keyin äleumettik jelilerde Ömirbek Babanovtıñ söylegen sözderin mülde basqa mağınada körsetetin videorolikter taralıp ketken. Onda rolikti jasauşılar Babanovtıñ «Tizerlep ömir sürgenşe, tik twrıp ölgenimiz artıq. Eger de qanday da bir policiya qızmetkeri özbek wltına tisetin bolsa, onda ol jwmıstan quılatın boladı» - degen konteksttegi şın mäninde bolmağan dünieni halıq arasına taratıp jibergen. Babanov jaqtastarınıñ oyınşa, bwnıñ barlığı Ömirbek Babanovtı qırğız halqı aldında özbekşil azamat retinde körsetu maqsatında jasalğan videolar. Mwnımen qatar qazannıñ 3-i küni Oş qalasında 50-ge juıq adam Ömirbek Babanovqa qarsı qarsılıq akciyasın wyımdastırğan. Biraq bir qızığı olarğa jergilikti äkimşilik eşqanday kedergi jasamağan. Bwl soñğı eki-üş künde bolğan qırğız prezident saylauınıñ körinisi ğana. Al saylau ötetin qazan ayınıñ on besine deyin äli on kün barın eskerse, onda qırğız elinen osığan wqsas äli talay jañalıq keletini anıq.

“The Qazaq Times”