Saud Arabiyası Reseyden S-400 qwrılğısın satıp aluı mümkin

Saud Arabiyası Reseyden S-400 «Triumf» äue qorğanıs jüyesin satıp aluı mümkin – dep habarlaydı "Kommersant" gazeti.

Basılımnıñ mälimetinşe, Saud Arabiyası Reseyden qwnı 2 mlrd dollardı qwraytın S-400 «Triumf» qwrılğısın satıp aluı mümkin. Atalmış mäselege baylanıstı kelissözder qazan ayınıñ soñında ötetin eki el arasındağı memleketaralıq kezdesude tolıqqandı talqılanatın boladı. Kelisim boyınşa, Saud Arabiyasınıñ äskeri-tehnikalıq «SAMI» kompaniyası reseylik S-400 äue qorğanıs jüyesin öz elderinde qwrastıruı tiis bolğan. Biraq reseylik tarap Saud Arabiyasınıñ bwl wsınısımen kelispegen. Resmi Mäskeu arabtarğa S-400 qwrılğısınıñ bölşekterin ğana qwrastıruğa rwqsat bergen. Eger eki el arasındağı kelissözder sätti ötetin bolsa, onda Saud Arabiyası  S-400 qwrılğısın satıp alğan üşinşi el boladı. Bwğan deyin Türkiya men Qıtay reseylik äue qorğanıs jüyesine tapsırıs bergen.

“The Qazaq Times”