فوتو: rediff.com

ساۋد ارابياسى رەسەيدەن س-400 «تريۋمف» اۋە قورعانىس جۇيەسىن ساتىپ الۋى مۇمكىن – دەپ حابارلايدى "كوممەرسانت" گازەتى.

باسىلىمنىڭ مالىمەتىنشە، ساۋد ارابياسى رەسەيدەن قۇنى 2 ملرد دوللاردى قۇرايتىن س-400 «تريۋمف» قۇرىلعىسىن ساتىپ الۋى مۇمكىن. اتالمىش ماسەلەگە بايلانىستى كەلىسسوزدەر قازان ايىنىڭ سوڭىندا وتەتىن ەكى ەل اراسىنداعى مەملەكەتارالىق كەزدەسۋدە تولىققاندى تالقىلاناتىن بولادى. كەلىسىم بويىنشا، ساۋد ارابياسىنىڭ اسكەري-تەحنيكالىق «SAMI» كومپانياسى رەسەيلىك س-400 اۋە قورعانىس جۇيەسىن ءوز ەلدەرىندە قۇراستىرۋى ءتيىس بولعان. بىراق رەسەيلىك تاراپ ساۋد ارابياسىنىڭ بۇل ۇسىنىسىمەن كەلىسپەگەن. رەسمي ماسكەۋ ارابتارعا س-400 قۇرىلعىسىنىڭ بولشەكتەرىن عانا قۇراستىرۋعا رۇقسات بەرگەن. ەگەر ەكى ەل اراسىنداعى كەلىسسوزدەر ءساتتى وتەتىن بولسا، وندا ساۋد ارابياسى  س-400 قۇرىلعىسىن ساتىپ العان ءۇشىنشى ەل بولادى. بۇعان دەيىن تۇركيا مەن قىتاي رەسەيلىك اۋە قورعانىس جۇيەسىنە تاپسىرىس بەرگەن.

“The Qazaq Times”