Foto: UBR.ua

Är minut, är sağat, är kün sayın elimizde, älemde halıqtı eleñ etkizer mañızdı jañalıqtar boladı. Al onıñ biri közge ilinse, endi biri nazardan tıs qalıp jatadı. Endeşe The Qazaq Times oqırmandarı üşin 25-30 qırküyek aralığında bolğan eñ mañızdı ekonomika jañalıqtarına şolu jasaydı.

Qazaqstanda kommunaldıq qızmet aqısı qımbattaytın boldı

QR Wlttıq ekonomika vice-ministri Serik Jwmanğarin 2018 jıldan bastap kommunaldıq qızmet tarifteri josparlı türde qımbattaytının mälimdedi.

"Jaña jıldan bastap biz wzaq merzimdi jospar boyınşa tarifterdi kötere bastaymız. Biraq köp emes, bağanı köteru 10 payızdan aspaydı", - dedi ol energetikanı baqılau jäne investiciya jönindegi konferenciyada. Ayta keteyik, qırküyek ayınıñ basında Prezident Nwrswltan Nazarbaev investorlardı tartu maqsatında twrğın üy-kommunaldıq şaruaşığına qatıstı zañdı jetildiru kerektigi turalı ükimetke tapsırma berip: "Biz jılu men su tarifterin kötermesek, investorlar kelmeydi. Öytkeni ärbir kelgen investor "Men stanciya salayın, biraq elektr energiyasın qanşağa sata alamın?" dep swraydı. Odan qorqudıñ (tarifterdi qımbattatu - red.) qajeti joq", - degen edi.

Qazaqstan biday eksportın azayttı

2017 jıldıñ qañtar-şilde ayında Qazaqstan 353,2 mln dollarğa 2,2 mln tonna biday eksporttağan.  Bwl körsetkiş 2016 jıldıñ säykes kezeñimen salıstırğanda tonna boyınşa 13,1%-ğa, aqşalay türde 12,9%-ğa tömendegen. Biday men meslinderdiñ eñ köp mölşeri Özbekstanğa (102,4 mln dollarğa 870,7 mıñ tonna), Täjikstanğa (86 mln dollarğa 529,8 mıñ tonna) jetkizilgen. Al Qıtayğa 37,6 mln dollarğa 207,3 mıñ tonna, Auğanstanğa 23,6 mln dollarğa 145,6 mıñ tonna, Qırğızstanğa 22,2 mln teñgege 126,1 mıñ tonna önim satılğan.

Şımkent äkimdigi JES qarızın jabu üşin memlekettik akciyaların sattı

Şımkent äkimdigi  "3-Energoortalıq" AQ-ğa memlekettik akciyalarınıñ 18 payızın sattı. Şımkent äkiminiñ orınbasarı Beysenbek Janbosınovtıñ aytuınşa, qala äkimdigi qarız köp bolğandıqtan osınday qadamğa barğan. Öytkeni halıqqa jılu jetkizetin jäne jılu tölemin jinaumen aynalısatın "Quat jılu ortalıq-33"  attı kommunaldıq käsipornı Jılu elektr stanciyası-3-ke 1,5 mlrd teñge qarız bolğan.

"Mäsele memlekettik akciyalardı satu boyınşa şeşildi. Akciyalardıñ 18%-ı "Z-Energoortalıq" AQ baqılau paketine ie investorğa 1,8 mlrd teñgege satıldı (investor ülesi - 76%). Bwdan bwrın JES akciyalarındağı memlekettik menşik 24%-dı qwrağan", - dedi Beysenbek Janbosınov.

Daniyar Aqışev şetel valyutasın satıp alğandar wtılatının ayttı

QR Wlttıq bank törağası Daniyar Aqışev Ükimet otırısında valyuta bağamınıñ birden qwbılıp ketuine eş negiz joq ekenin aytıp, şetel valyutasın satıp alıp jatqandar wtılıp qalatshının ayttı.

"Biz eldigi, sauda seriktesterindegi jağday qalıptı ekenin bayqap otırmız. Tipti ayırbastau bağamdarı da twraqtı. Sondıqtan alañdaudıñ eş qajeti joq. Men osı narıqta payda tabuğa tırısıp jatqan azamattar men käsipkeler üşin tağı qaytalap aytqım keledi: biz bwğan deyin de valyuta kursı özgergen kezde birden ayırbastau punkterine barıp, ortada payda tauıp qaluğa tırısudıñ eş mäni joq ekenin birneşe märte mälimdegenbiz. Tipti wtılıp qaluıñız da mümkin. Sebebi ayırbas bağamı, makroekonomikalıq jağday jaqsı. Tipti ol nığayuı (teñge - red.) mümkin. Sondıqtan valyuta satıp alğan keybir adamdar wtılıp qaladı", - dedi Aqışev.

Deputat Azat Peruaşev: Qoğam ofşordan qanşa jarjı qaytarılğanı turalı bilu kerek

Mäjilis deputatı Azat Peruaşev qoğam qarajattı zañdastıru kezinde qanşa qarjı ofşordan qaytarılğanın jäne onıñ qanşa soması jinalğanın bilui kerek dep esepteydi. Ol osığan qatıstı mälimetterdi jariyalaudı talap etti.

Osılayşa "Aq jol" frakciyasınıñ köşbasşısı QR Prem'er-ministri Baqıtjan Sağıntaev pen QR Bas Prokurorı Jaqıp Asanovqa osınday deputattıq saual joldadı.

"Qoğam zañdastıruğa qatıstı naqtı aqparattı bilui tiis dep esepteymiz. Osığan baylanıstı bizge ofşorlı aymaqtan Qazaqstan ekonomikasına qanşa aqşa qaytarılğanı turalı jäne qwqıq qorğau organdarınıñ äreketi nätijesinde jinalğan qarajat jöninde aqparat beruleriñizdi swraymız. Bwdan bölek, Qazaqstannan qarajat alıp şığuğa qanşa ret äreket jasalğan?", - dedi deputat.

Qazaqstan bäsekege qabiletti elder reytinginde tömendep ketti

Qazaqstan Dünie jüzilik ekonomikalıq forumnıñ (DEF) jahandıq bäsekege qabilettilik indeksi turalı reytinginde  57-şi orınğa ie bolıp,tört satığa tömen tüsti. Tizimde 137 eldiñ atı körsetilgen. Bwl turalı wyımnıñ bayandamasında aytıldı.  Qazaqstannıñ türli körsetkişter boyınşa ortaşa balı 4,35 (2016 jılı 4,41 balmen 53 orında bolğan) boldı. Qazaqstanmen qatarlas twrğan elder Filippin (56-orın) men Ruanda eli (58-orında). Äzerbayjan reyting boyınşa 35-şi orında, Al Reseydiñ körsetkişi üş satığa tömendep, 38-şi orında twr.

Qırğızstan Qazaqstan kömirin satıpp alğısı kelmeydi

Biıl Qırğızstan biligi Qazaqstan kömirinen soñğı 450 mıñ tonnanı satıp alıp, kelesi jıldan bastap importtı tolıq toqtatudı josparlap otır. Bwl turalı atalğan eldiñ wlttıq energetika holdinginiñ basşısı Aybek Qaliev ükimet otırısında mälimdedi.

Qırğızstan Qazaqstan kömirin satıp alğısı kelmeydi

Qırğızstan ministrler kabinetiniñ basşısı  Sapar Iskakov jinalıs kezinde "Memleket nelikten Qazaqstannan äli de kömir satıp alıp otırğanın jäne Bişkek jılu elektr stanciyası jergilikti kömirdi qaşan paydalana bastaytının" swrağan. Bwğan Wlttıq energetika holdinginiñ basşısı jıl sayın qazaqstandıq kömirdi satıp alu qısqarıp kele jatqanın aytqan. Onıñ sözinşe, biıl importtalğan kömir kölemi eki esege, 400 mıñ tonnağa deyin azayğan (bıltırğı körsetkiş 700 mıñ tonna bolğan).

“The Qazaq Times”