Qırğızstan prezidenti Almazbek Atambaev BWW-nıñ Bas Assambleyasında qırğız halqına arnap söz söyledi.

Ol onda: «Qadirmendi meniñ qırğız elim, qwrmetti otandastarım. Söz soñında men sizderge bir ötiniş aytqım keledi. Biz san ğasırlar boyı izdegen jolımızdı endi taptıq. Birneşe künnen keyin qırğızdar öziniñ köşbasşısın saylaydı. Sol kezde oligarhtar men özge eldiñ basşılarınıñ sözine erip öz jolımızdan adasıp qalmayıq» - degen.

Esteriñizge salayıq, bwğan deyin Qırğızstan SİM Qazaqstanğa nota jibergen bolatın. Oğan sebep Nwrswltan Nazarbaevtıñ qırğız prezidenttigine ümitker «Respublika – Ata Jwrt» frakciyasınıñ jetekşisi Ömirbek Babanovpen kezdesui. Resmi Bişeketiñ sözinşe, Nazarbaevtıñ Babanovpen kezdesui Qırğızstannıñ işki isterine aralasu.

“The Qazaq Times”