2017 jılı öz ömirin qalıptı deñgeyde bağalaytın qazaqstandıqtardıñ ülesi 56,5%-dı qwrağan. Al osıdan eki jıl bwrınğı körsetkiş 61,2% deñgeyinde bolğan. 

Statistika komitetiniñ mälimetterine süyensek, öz ömirine rizaşılıqpen qaraytın halıqtıñ ülesi  41,7%-dı qwraydı. Ömirine köñili tolmaytındardıñ ülesi - 1,6%. Eñ qızığı auıldı jerlerde twratın twrğındar qalalarıqtarğa qarağanda özderin äldeqayda baqıttı sezinedi eken. Olardıñ körsetkişi - 63,5%, al qalalıqtardıñ ülesi osı körsetkişten 11,1%-ğa tömen bolıp otır.

Özderin köbine baqıttı sezinetin qazaqstandıqtardıñ köpşiligi 15-17 jas (64,4%) jäne 18-28 jas (61,0%) aralığındağılar.

Mälämetke sensek, twrğındardıñ köpşiligi köbine twrğın üyge qatıstı mäselelerdi jii aytqan. Mısalı respondentterdiñ 52,6%-ı twrğın üy bağasınıñ qımbat ekenin aytsa, 34,5%-ı qarajattıñ jetkiliksiz ekenine, 29,4%-ı ipotekalıq kredit mölşerlemesiniñ joğarı bolatınına toqtalğan.

Ala äleumettik deñgey boyınşa respondentterdiñ 52,1%-ı özderiniñ jağdayın qanağattanarlıq dep esepteydi. Al 2,6%-ı jağdayın tömen dep körsetse, 0,3%-ı özderiniñ äleumettik jağdayın joğarğı därejede bağalaydı.

Sonday-aq, pikir bildiruşilerdiñ 35,2%-ı özine ne qajet, sonıñ bärin satıp ala altındarın aytsa, 31,4%-ı kiim, tamaq satıp aluğa qarajattarı jetkilikti bolğanmen, tehnika satıp alu kezinde qarajattan qısılatındarın mälimdegen. 3,8%-ı tipti tamaq satıp ala almay qalatın kezderi bolatının habarlağan.

Bolaşaqtağı jağdayğa keler bolsaq, 40,2% respondent özderiniñ keleşegin qalıptı boladı dep esepteydi. 37,7%-ı ömirleriniñ jaqsaratınına sense, 0,3%-ı ömir süru mülde qiın boladı deydi.

“The Qazaq Times”