Foto: LiveJournal

Ündistan men Qıtay eki ayğa sozılğan qarsılıqtardan soñ, şekaradağı daulı territoriyadan öz äskerlerin alıp ketu turalı kelisimge keldi. Bwl turalı BBC aqparattıq agenttigi jazdı. 

Qıtay Ükimeti Ündistannıñ öz äskerin alıp ketetinin, al Pekin territoriyalıq dauda öz müddesin qorğaudı jalğastıratının jetkizdi. Bwl mälimdemeni Ündistan biligi de rastadı.

Doklam aymağı Gimalaylıq Butan men Qıtay arasındağı şeşimin tappağan territoriyalıq daudıñ negizgi sebebi. Ündistan Butannıñ qwqığın qorğap, onıñ atalğan jerge ielik etuin qoldaydı. Ündistan men Qıtaydıñ äskerlerin bir-birine qarsı qoyıp, eki ay boyı aymaqta şielenisken jağdaydı qalıptastırğan oqiğa Pekinniñ Doklamğa baratın şekaralıq joldı keñeytu turalı şeşiminen bastaldı. Qıtaydıñ äreketine qarsı bolğan Ündistan öñirdegi äsker sanın arttırıp, qos tarap birneşe ret şağın qaqtığıstar jürgizdi.

Delidegi Qıtayğa qatıstı zertteuler institutınıñ qızmetkeri Atul Bhardvadj:  "Eki aziyalıq alpauıt memleketterdiñ konfrontaciyası wzaqqa sozıla almaytını belgili edi, sondıqtan diplomatiya - eñ wtımdı şeşim", - dep esepteydi. Sonday-aq ğalım: "Ündistan birinşi kezekte Butandı qoldau turalı uädesine berik boluğa tırısqanımen, şeneunikter oyınan aynıp qalğan siyaqtı. Ündistanğa Qıtaydıñ narığı men investiciyası kerek, sondıqtan memleket biligi özi üşin tiimdi taraptı  tañdadı"", -  deydi.

“The Qazaq Times”