ءۇندىستان مەن قىتاي ديپلوماتيالىق كەلىسىمگە كەلدى

ءۇندىستان مەن قىتاي ەكى ايعا سوزىلعان قارسىلىقتاردان سوڭ، شەكاراداعى داۋلى تەرريتوريادان ءوز اسكەرلەرىن الىپ كەتۋ تۋرالى كەلىسىمگە كەلدى. بۇل تۋرالى BBC اقپاراتتىق اگەنتتىگى جازدى. 

قىتاي ۇكىمەتى ءۇندىستاننىڭ ءوز اسكەرىن الىپ كەتەتىنىن، ال پەكين تەرريتوريالىق داۋدا ءوز مۇددەسىن قورعاۋدى جالعاستىراتىنىن جەتكىزدى. بۇل مالىمدەمەنى ءۇندىستان بيلىگى دە راستادى.

دوكلام ايماعى گيمالايلىق بۋتان مەن قىتاي اراسىنداعى شەشىمىن تاپپاعان تەرريتوريالىق داۋدىڭ نەگىزگى سەبەبى. ءۇندىستان بۋتاننىڭ قۇقىعىن قورعاپ، ونىڭ اتالعان جەرگە يەلىك ەتۋىن قولدايدى. ءۇندىستان مەن قىتايدىڭ اسكەرلەرىن ءبىر-بىرىنە قارسى قويىپ، ەكى اي بويى ايماقتا شيەلەنىسكەن جاعدايدى قالىپتاستىرعان وقيعا پەكيننىڭ دوكلامعا باراتىن شەكارالىق جولدى كەڭەيتۋ تۋرالى شەشىمىنەن باستالدى. قىتايدىڭ ارەكەتىنە قارسى بولعان ءۇندىستان وڭىردەگى اسكەر سانىن ارتتىرىپ، قوس تاراپ بىرنەشە رەت شاعىن قاقتىعىستار جۇرگىزدى.

دەليدەگى قىتايعا قاتىستى زەرتتەۋلەر ينستيتۋتىنىڭ قىزمەتكەرى اتۋل بحاردۆادج:  "ەكى ازيالىق الپاۋىت مەملەكەتتەردىڭ كونفرونتاتسياسى ۇزاققا سوزىلا المايتىنى بەلگىلى ەدى، سوندىقتان ديپلوماتيا - ەڭ ۇتىمدى شەشىم", - دەپ ەسەپتەيدى. سونداي-اق عالىم: ء"ۇندىستان ءبىرىنشى كەزەكتە بۋتاندى قولداۋ تۋرالى ۋادەسىنە بەرىك بولۋعا تىرىسقانىمەن، شەنەۋنىكتەر ويىنان اينىپ قالعان سياقتى. ۇندىستانعا قىتايدىڭ نارىعى مەن ينۆەستيتسياسى كەرەك، سوندىقتان مەملەكەت بيلىگى ءوزى ءۇشىن ءتيىمدى تاراپتى  تاڭدادى"", -  دەيدى.

“The Qazaq Times”