Foto: inform.kz

Halıq bank pen Qazkom jäne Altın bank Wlttıq banktiñ sauıqtıru bağdarlamasına qatıspaydı. Bwl turalı Halıq banktiñ basqarma törağası Ümit Şayahmetova baspasöz konferenciyasında mälimdedi. 

"Halıq bank te, Altın bank sındı enşiles bankter de, Qazkom-da Wlttıq banktiñ bwl bağdarlamasına qatıspaydı. Biz özimizdegi problemalı kreditterdiñ ülesin kreditterdi jabu, aktivterdi satu jäne  basqa qwrılımdar arqılı tömendetetin bolamız", - dedi Şayahmetova.

Sonday-aq, bank basşısı Qazkom akcioneri bolıp otırğandıqtan Halıq bank atalğan banktiñ barlıq mindettemelerine jauap beretinin atap ötti.

"Qazirgi tañda Qazkom-nıñ direktorlar keñesinen bastap basqarma menedjmenti tolıq özgerdi. Qazir bäri baqılauda. Banktiñ 99 payızğa juıq akciyasına ielik etemiz... Endi aldağı uaqıtta Halıq banktiñ de, Qazkom menedjmentiniñ de alğa qoyğan mindeti - Qazkom-dı odan arı damıtu üşin jaña strategiyalardı qwru. Sonday-aq, bwğan deyin aytılğanday, bankter eki bölek qarjı institutı retinde jäne eki bölek zañdı twlğa retinde saqtaladı", - dedi Halıq bank basşısı.

Ayta keteyik, QR Wlttıq banki şilde ayında Qazaqstandağı iri bankterdi qoldau bağdarlamasınıñ bastalğanı turalı habarlağan. Bağdarlamağa 500 mlrd teñge jwmsaluı mümkin jäne ol bankterdiñ jiıntıq kapitalı 1 trln teñgege jetkenşe 15 jılğa sozıladı. Bas bank törağasınıñ orınbasarı Oleg Smolyakovtıñ sözinşe, aldağı 1,5 ay işinde Wlttıq banktiñ enşiles wyımı ärbir bankti sauıqtıruğa qatıstı jeke jospar dayındaydı. Wyım osı jıldıñ tamız-qırküyek aylarında iske qosılıp qaluı mümkin.

“The Qazaq Times”