Foto: turkystan.kz

2017 jılğı 1 şildedegi jağday boyınşa zeynetaqı jinağınıñ jalpı soması 7,14 trln. teñgeni qwradı, bwl jıl basındağı somadan 450 mlrd teñgege (nemese 6,3%-ğa) köbirek. Bwl turalı qordıñ baspasöz qızmeti habarladı.

"Bükil zeynetaqı jinağınıñ basım böligi, yağni 98,3%-ı mindetti zeynetaqı jarnası esebinen qwraldı. Osı twsta 2017 jıldıñ birinşi jartısındağı tüsimniñ jalpı soması 364,9 mlrd. teñgeni qwradı.Aldıñğı jılğı körsetkişpen salıstırar bolsaq, ötken jıldıñ tura osınday kezeñinde zeynetaqı jarnası 221,8 mlrd. teñgeni qwrağan, yağni bwl soma 64,5%-ğa ösip otır", delingen baspasöz habarlamasında.

2017 jıldıñ 6 ayı işinde salımşılarğa (aluşılarğa) tiesili 201,3 mıñ jeke zeynetaqı şotı  (JZŞ) aşıldı. Üstimizdegi jıldıñ 1 şildesindegi jağdayğa säykes şarttardıñ barlığı boyınşa aşılğan JZŞ jalpı sanı 10,07 mln. birlikti qwradı.

BJZQ-nıñ 2017 jıldıñ 6 ayı işinde tölegen zeynetaqı tölemderiniñ soması  121,25 mlrd teñge qwradı, ötken jıldıñ tura osınday kezeñinde bwl soma 96,59 mlrd bolğan, yağni ösim 25,5%-dı qwradı. Osı bükil somanıñ işindegi 86,6 mlrd. teñge (nemese 71,4%-ı) zeynetaqı jasına jetken kezde tölenetin zeynetaqı bolsa, 14,7 mlrd. teñge (nemese 12,1%) saqtandıru wyımdarına audarılğan zeynetaqı jinaqtarı, 9,7 mlrd. teñge (nemese 8%) şetelge twraqtı twruğa ketuge baylanıstı jasalğan tölemder, 10,3 mlrd. teñge (nemese 8,5%) basqa da birjolğı tölemder (mwragerlerge jäne jerleu üşin) bolıp tabıladı.

2017 jıldıñ birinşi jartısındağı taza investiciyalıq tabıs soması 205,69 mlrd. teñge qwradı. Söytip 2017 jıldıñ 1 qañtarınan bastap 30 mausımı aralığındağı kezeñde salımşılardıñ (aluşılardıñ) şotına ülestirilgen BJZQ zeynetaqı aktivteriniñ tabıstılığı inflyaciyanıñ 3,7%-ğa teñ deñgeyinde 3,01%-dı qwrağan.

2017 jıldıñ 6 ayı işinde BJZQ-nıñ jeke qızmet körsetu ortalıqtarında barlığı 2,9 mln-ğa juıq operaciya jürgizildi, yağni BJZQ keñselerinde twrğındarğa arnap künine 25 mıñğa juıq qızmet (operaciya) körsetiledi.

Ayta keteyik, 2017 jıldıñ 1 mamırındağı jağday boyınşa BJZQ problemalı aktivteriniñ kölemi 40,5 mlrd teñgeni qwrağan jäne ol 21 emitentke tiesili ekenin mälimdegen.

“The Qazaq Times”