Foto: APF

Venesuelada ötken saylau nätijelerin tekserumen aynalısqan Smartmatic tehnologiyalıq kompaniyası Londonda ötken baspasöz konferenciyası kezinde "Nikolas Maduronıñ Ükimeti saylauğa qatısqan halıq sanın asıra jazıp, qorıtındılardı qoldan jasağan", - dep mälimdedi. Bwl turalı APF aqparattıq agenttigi jazadı.

Venesuelada Qwrıltay jinalısına kandidattardı saylau aynalasındağı dau äli de tolastar emes. El Prezidentiniñ aşıq qarsılası, bas Prokuror Luiza Ortega halıqtıñ qarsılığına qaramastan ötkizilgen saylau barısında orın alğan ädiletsizdikter men zañsızdıqtardı äşkereleu üşin öziniñ jeke zertteu jwmıstarın bastaytının jetkizdi.

545 adamnan twratın Qwrıltay jinalısı Maduroğa qarsı oppoziciyanı taratıp, Konstituciyağa özgerister engize alu qwqığına ielenedi. Jañadan saylanğan qwzıretti organ müşeleriniñ qatarında Venesuela Prezidentiniñ wlı men äyeli de bar.

Nikolas Maduro demokratiyağa qarsı äreket etip, Venesuela halqınıñ qalauın eskermegeni üşin älem memleketteri tarapınan qatañ sınğa wşırağanına, säuir ayınan beri elde ötip jatqan köterilister nätijesinde 125 adamnıñ qanı tögilgenine qaramastan, öz degeninen qaytpay otır. Ol eldegi sayasi, äleumettik jäne ekonomikalıq qiındıqtardı şeşudiñ jalğız jolı Konstituciyanı özgertu ekendigine senimdi.

Esteriñizge sala keteyik, Venesuela Ükimeti: "Qwrıltay jinalısı müşelerin saylauğa halıqtıñ 40 payızğa juığı, 8 million şamasında azamattar qatıstı" degen bolatın. Al Oppoziciya: "Dauıs bergenderdiñ sanı 3,5 mln-nan aspaydı, olar saylauğa memlekettiñ qısımımen, qızmetinen ayırılıp qaluğa qorıqqandıqtan barğan memlekettik qızmetkerler", - dep otır.

Datanalisis firması jürgizgen saualnamağa säykes, Venesuela azamattarınıñ 70 payızı Qwrıltay jinalısınıñ qwrıluına qarsı ekendikterin aytqan.

16 şilde küni Oppoziciya ötkizgen referendumda 7,6 mln adam Ükimettiñ äreketterine narazılıq tanıtıp, dauıs bergen.

“The Qazaq Times”