تاۋەلسىز ساراپشىلار: "ۆەنەسۋەلاداعى سايلاۋ ناتيجەلەرى قولدان جاسالعان"

ۆەنەسۋەلادا وتكەن سايلاۋ ناتيجەلەرىن تەكسەرۋمەن اينالىسقان Smartmatic تەحنولوگيالىق كومپانياسى لوندوندا وتكەن ءباسپاسوز كونفەرەنتسياسى كەزىندە "نيكولاس مادۋرونىڭ ۇكىمەتى سايلاۋعا قاتىسقان حالىق سانىن اسىرا جازىپ، قورىتىندىلاردى قولدان جاساعان", - دەپ مالىمدەدى. بۇل تۋرالى APF اقپاراتتىق اگەنتتىگى جازادى.

ۆەنەسۋەلادا قۇرىلتاي جينالىسىنا كانديداتتاردى سايلاۋ اينالاسىنداعى داۋ ءالى دە تولاستار ەمەس. ەل پرەزيدەنتىنىڭ اشىق قارسىلاسى، باس پروكۋرور لۋيزا ورتەگا حالىقتىڭ قارسىلىعىنا قاراماستان وتكىزىلگەن سايلاۋ بارىسىندا ورىن العان ادىلەتسىزدىكتەر مەن زاڭسىزدىقتاردى اشكەرەلەۋ ءۇشىن ءوزىنىڭ جەكە زەرتتەۋ جۇمىستارىن باستايتىنىن جەتكىزدى.

545 ادامنان تۇراتىن قۇرىلتاي جينالىسى مادۋروعا قارسى وپپوزيتسيانى تاراتىپ، كونستيتۋتسياعا وزگەرىستەر ەنگىزە الۋ قۇقىعىنا يەلەنەدى. جاڭادان سايلانعان قۇزىرەتتى ورگان مۇشەلەرىنىڭ قاتارىندا ۆەنەسۋەلا پرەزيدەنتىنىڭ ۇلى مەن ايەلى دە بار.

نيكولاس مادۋرو دەموكراتياعا قارسى ارەكەت ەتىپ، ۆەنەسۋەلا حالقىنىڭ قالاۋىن ەسكەرمەگەنى ءۇشىن الەم مەملەكەتتەرى تاراپىنان قاتاڭ سىنعا ۇشىراعانىنا، ءساۋىر ايىنان بەرى ەلدە ءوتىپ جاتقان كوتەرىلىستەر ناتيجەسىندە 125 ادامنىڭ قانى توگىلگەنىنە قاراماستان، ءوز دەگەنىنەن قايتپاي وتىر. ول ەلدەگى ساياسي، الەۋمەتتىك جانە ەكونوميكالىق قيىندىقتاردى شەشۋدىڭ جالعىز جولى كونستيتۋتسيانى وزگەرتۋ ەكەندىگىنە سەنىمدى.

ەستەرىڭىزگە سالا كەتەيىك، ۆەنەسۋەلا ۇكىمەتى: "قۇرىلتاي جينالىسى مۇشەلەرىن سايلاۋعا حالىقتىڭ 40 پايىزعا جۋىعى، 8 ميلليون شاماسىندا ازاماتتار قاتىستى" دەگەن بولاتىن. ال وپپوزيتسيا: "داۋىس بەرگەندەردىڭ سانى 3,5 ملن-نان اسپايدى، ولار سايلاۋعا مەملەكەتتىڭ قىسىمىمەن، قىزمەتىنەن ايىرىلىپ قالۋعا قورىققاندىقتان بارعان مەملەكەتتىك قىزمەتكەرلەر", - دەپ وتىر.

Datanalisis فيرماسى جۇرگىزگەن ساۋالناماعا سايكەس، ۆەنەسۋەلا ازاماتتارىنىڭ 70 پايىزى قۇرىلتاي جينالىسىنىڭ قۇرىلۋىنا قارسى ەكەندىكتەرىن ايتقان.

16 شىلدە كۇنى وپپوزيتسيا وتكىزگەن رەفەرەندۋمدا 7,6 ملن ادام ۇكىمەتتىڭ ارەكەتتەرىنە نارازىلىق تانىتىپ، داۋىس بەرگەن.

“The Qazaq Times”