Qarajanbasmwnay kenişinde eñbek etetin Industrial service resources mekemesiniñ 200-ge tarta jwmısşısı ereuildetti. 28 şilde 2021 jıl. Mañğıstau oblısı, Tüpqarağan audanı. Foto: Azattıq radiosı / körermennen

Qazaqstanda jwmısşılar tabınıñ äleumettik sayasatı älsiregendigi bayqaladı. Biıl jiilegen Mañğıstaudağı eñbek dauına baylanıstı ereuilder qatarı Qarajanbasmwnay kenişinde isteytin jwmısşılarınıñ narazılığı tolıqtırdı.

Azattıq radiosınıñ habarlauınşa, 28 şildede «Qarajanbasmwnay» kompaniyasına autsorsing kelisim-şartpen qızmet körsetip jatqan Industrial service resources mekemesiniñ 170-ten astam jwmısşısı ereuilge şıqtı. Olar jwmıs beruşige birneşe talap qoyıp otır. Atap aytqanda:

  • Autsorsing mekeme jwmısşıların «Qarajanbasmwnay» kompaniyasına ştatqa alu;
  • Mamır ayında mekemeniñ 70-ke juıq jwmısşısınıñ jalaqısı tek 4 payızğa ğana köterilgen, onı qajetinşe ösiru;
  • äleumettik paket engizu;

Qazir narazılar jwmıstı tolıq toqtatqan. Internette tarağan videoda jüzden astam adamnıñ keniş mañındağı jwmısşılar qalaşığında twrğanı körinedi.

– «Qarajambasmwnayda» jwmıstıñ 70%-ın osı autsorsing mekeme jigitteri atqarıp jür. Onı bastıqtar da biledi. İndet jağdaydı uşıqtırıp jiberdi. Mwnda däri-därmekke aqşa taba almay otırğan jwmısşılar bar. Jalaqı mardımsız bolğandıqtan äyeli, bala-şağası auırıp, däri-därmek üşin qarızdanıp ketken adamdar bar. Birine jetse, birine jetpeydi. Talaptarımız orındalmayınşa, ereuildi toqtatpaymız, – degen atı-jönin aytpağan jwmısşılardıñ biri Azattıq radiosına.

Jwmısşılardıñ sözine qarağanda, särsenbi küni olarğa basşılıqtan Oñğar Qabılov esimdi adam kelgen. Narazılar oğan talaptarın jetkizgen. Qabılov aqparat qwralı habarlasqanda tilşi ekenin bilgen boyda twtqanı öşirip tastağan.

Aqparatqa qarağanda, Industrial service resources kompaniyası qwrılıs-montaj, wñğıma jöndeu siyaqtı türli qızmet körsetumen aynalısadı. «Qarajanbasmwnay» kenişi Mañğıstau oblısı Tüpqarağan audanında ornalasqan.

Şilde ayınıñ ortasında «Qarajanbasmwnayğa» küzet qızmetin körsetetin mekeme jwmısşıları bas köterip, talaptarı orındalğannan keyin jwmısqa şıqqan. Däl osığan wqsas sipatta jıl basınan beri Caspian Catering Service, NBKS, Özenenergoservis, KMG-Security, MwnaySpecSnabkompani t.b. keminde on şaqtı eñbek wjımı eñbek jağdayın jaqsartıp, jalaqını ösirudi talap etip, ereuilge şıqqan, keybiri aştıq jariyalauğa da mäjbür bolğan.

Qazaqstanda eñbek mäseleleri jii köteriledi. Sarapşılar men jeli qoldanuşıları  pandemiya kezindegi qımbatşılıq pen äleumettik ahualdıñ naşarlauı sebepti jwrttıñ twrmısı tipti qiındap, köbi künköris hälinde tirşilik etip jürgenin aytadı.

“The Qazaq Times”