Foto: arabmir.net

Katar biligi Saud Arabiyası men onıñ odaqtastarı wsınğan jaña "qara tizimdi" tanıstırıp, özderiniñ terrorizmge qarsı küreske qosıp otırğan ülesine qaramastan, "lañkestik wyımdardı qoldauşı" degen ayıptardan nege arıla almağanına tañdanıstarın jasırmadı.

Memleket basşısı baspasöz qızmetiniñ ökili şeyh Sayf bin Ahmed al' Tani Dohamen astırtın baylanısı bar degen küdikti tizimge ilikken adamdarğa kinä artuğa eş negiz joq dep esepteydi. Ol : "Arab memleketteriniñ Katarğa terrorizmdi qoldadı degen jalğan ayıp tağudı äli de jalğastırıp kele jatqandarı tañqalarlıq "tosın sıy" boldı", - dedi.

Atap ötu kerek, Parsı şığanağınıñ bayırğı seriktesi AQŞ-tıñ dağdarıstı şeşu üşin,  Arab memleketterine bir aptalıq "boykot" jariyalauı da, älemdik qauımdastıqtıñ körsetken qısımı da, olardıñ Katarğa oñ qabaq tanıtuına äser ete alğan joq.

Birikken Arab Ämirlikteri, Saud Arabiyası, Bahreyn men Egipetten twratın "törttik" osıdan aldın qwrılğan, 59 jeke twlğa men 12 toptıñ attarı jazılğan  "qara tizimge", tağı 18 toptı qosıp otır. Olardıñ qatarında Liviya, Yemenniñ qayırımdılıq qorları, birqatar baspasöz qwraldarı da bar.

Şeyh Sayf bin Ahmed al' Tani: "Soñğı jariyalanğan tizim Arab memleketteriniñ terrorizmge qarsı qarımdı küres jürgizuge müddeli emes ekendikterin körsetedi. Katarda lañkestermen baylanısı anıqtalğan azamattardıñ barlığı qılmıstıq jauapkerşilikke tartıldı. Bizge qarsı blokada ornatıp otırğan tört memleketke jalğan tizimder jasauğa uaqıt jwmsağanşa, öz elderindegi terrorizmmen küreske şınayı köñil böluge keñes beremiz".

Esteriñizge sala keteyik, 5 mausım küni joğarıda atalğan tört Arab memleketi Katardıñ jalğız qwrlıqtağı şekarasın jauıp, öz azamattarın elge qaytarıp, äue jäne teñiz joldarın bwğattap, barlıq diplomatiyalıq qarım-qatınastardan bas tartqan bolatın. Olardıñ Katarğa wsınğan 13 tarmaqtan twratın talaptarı orındalğan joq, sebebi el ükimeti bwl qadamdı memleket täuelsizdigine qol swğu dep taptı. Juırda şığanaqta remi issaparmen bolğan Türkiya Prezidenti Redjep Tayıp Erdoğan, AQŞ-tıñ memlekettik hatşısı Reks Tillerson jäne blokada ornatuşı memleketter men Katar arasında mediaciyalıq qızmet atqaruşı Kuveyttiñ kelissözderge şaqıruı nätijesiz ayaqtaldı.

Osı seysenbide Euroodaqtıñ diplomatiyalıq basşısı Federika Mogerinimen ötken kezdesuden soñ, Egipettiñ sırtqı ister ministrligi Katarmen eşqanday kelissözderge barmaytındarın mälimdedi. Däl osı küngi mälimdemede Katar, Kuveyt pen Yemen "Al'-Kaida" wyımınıñ sodırların qarjılandırıp kelgen degen pikir aytıldı.

“The Qazaq Times”