اراب ەلدەرى كاتارمەن ىنتىماقتاستىق ورناتۋدان تۇبەگەيلى باس تارتتى

كاتار بيلىگى ساۋد ارابياسى مەن ونىڭ وداقتاستارى ۇسىنعان جاڭا "قارا ءتىزىمدى" تانىستىرىپ، وزدەرىنىڭ تەرروريزمگە قارسى كۇرەسكە قوسىپ وتىرعان ۇلەسىنە قاراماستان، "لاڭكەستىك ۇيىمداردى قولداۋشى" دەگەن ايىپتاردان نەگە ارىلا الماعانىنا تاڭدانىستارىن جاسىرمادى.

مەملەكەت باسشىسى ءباسپاسوز قىزمەتىنىڭ وكىلى شەيح سايف بين احمەد ال تاني دوحامەن استىرتىن بايلانىسى بار دەگەن كۇدىكتى تىزىمگە ىلىككەن ادامدارعا كىنا ارتۋعا ەش نەگىز جوق دەپ ەسەپتەيدى. ول : "اراب مەملەكەتتەرىنىڭ كاتارعا تەرروريزمدى قولدادى دەگەن جالعان ايىپ تاعۋدى ءالى دە جالعاستىرىپ كەلە جاتقاندارى تاڭقالارلىق "توسىن سىي" بولدى", - دەدى.

اتاپ ءوتۋ كەرەك، پارسى شىعاناعىنىڭ بايىرعى سەرىكتەسى اقش-تىڭ داعدارىستى شەشۋ ءۇشىن،  اراب مەملەكەتتەرىنە ءبىر اپتالىق "بويكوت" جاريالاۋى دا، الەمدىك قاۋىمداستىقتىڭ كورسەتكەن قىسىمى دا، ولاردىڭ كاتارعا وڭ قاباق تانىتۋىنا اسەر ەتە العان جوق.

بىرىككەن اراب امىرلىكتەرى، ساۋد ارابياسى، باحرەين مەن ەگيپەتتەن تۇراتىن "تورتتىك" وسىدان الدىن قۇرىلعان، 59 جەكە تۇلعا مەن 12 توپتىڭ اتتارى جازىلعان  "قارا تىزىمگە", تاعى 18 توپتى قوسىپ وتىر. ولاردىڭ قاتارىندا ليۆيا، يەمەننىڭ قايىرىمدىلىق قورلارى، بىرقاتار ءباسپاسوز قۇرالدارى دا بار.

شەيح سايف بين احمەد ال تاني: "سوڭعى جاريالانعان ءتىزىم اراب مەملەكەتتەرىنىڭ تەرروريزمگە قارسى قارىمدى كۇرەس جۇرگىزۋگە مۇددەلى ەمەس ەكەندىكتەرىن كورسەتەدى. كاتاردا لاڭكەستەرمەن بايلانىسى انىقتالعان ازاماتتاردىڭ بارلىعى قىلمىستىق جاۋاپكەرشىلىككە تارتىلدى. بىزگە قارسى بلوكادا ورناتىپ وتىرعان ءتورت مەملەكەتكە جالعان تىزىمدەر جاساۋعا ۋاقىت جۇمساعانشا، ءوز ەلدەرىندەگى تەرروريزممەن كۇرەسكە شىنايى كوڭىل بولۋگە كەڭەس بەرەمىز".

ەستەرىڭىزگە سالا كەتەيىك، 5 ماۋسىم كۇنى جوعارىدا اتالعان ءتورت اراب مەملەكەتى كاتاردىڭ جالعىز قۇرلىقتاعى شەكاراسىن جاۋىپ، ءوز ازاماتتارىن ەلگە قايتارىپ، اۋە جانە تەڭىز جولدارىن بۇعاتتاپ، بارلىق ديپلوماتيالىق قارىم-قاتىناستاردان باس تارتقان بولاتىن. ولاردىڭ كاتارعا ۇسىنعان 13 تارماقتان تۇراتىن تالاپتارى ورىندالعان جوق، سەبەبى ەل ۇكىمەتى بۇل قادامدى مەملەكەت تاۋەلسىزدىگىنە قول سۇعۋ دەپ تاپتى. جۋىردا شىعاناقتا رەمي ىسساپارمەن بولعان تۇركيا پرەزيدەنتى رەدجەپ تايىپ ەردوعان، اقش-تىڭ مەملەكەتتىك حاتشىسى رەكس تيللەرسون جانە بلوكادا ورناتۋشى مەملەكەتتەر مەن كاتار اراسىندا مەدياتسيالىق قىزمەت اتقارۋشى كۋۆەيتتىڭ كەلىسسوزدەرگە شاقىرۋى ناتيجەسىز اياقتالدى.

وسى سەيسەنبىدە ەۋرووداقتىڭ ديپلوماتيالىق باسشىسى فەدەريكا موگەرينيمەن وتكەن كەزدەسۋدەن سوڭ، ەگيپەتتىڭ سىرتقى ىستەر مينيسترلىگى كاتارمەن ەشقانداي كەلىسسوزدەرگە بارمايتىندارىن مالىمدەدى. ءدال وسى كۇنگى مالىمدەمەدە كاتار، كۋۆەيت پەن يەمەن "ال-كايدا" ۇيىمىنىڭ سودىرلارىن قارجىلاندىرىپ كەلگەن دەگەن پىكىر ايتىلدى.

“The Qazaq Times”