Almatı qalasında tolıqtay otandıq önimder saudağa qoyılatın, täulik boyı jwmıs isteytin «From KZ» konceptualdı dükeni iske qosıldı. Qazaqstandıq tauar öndiruşilerdi qoldaumen aynalısatın «Wlı Jibek jolı» qauımdastığınıñ bastamasımen qwrılğan dükendegi sauda orındarı barlıq otandıq tauar belgileri üşin tegin beriledi.

Wlttıq naqıştağı jeydeler

«Osı uaqıtqa deyin «Sauda qatarlarındağı otandıq tauarlardıñ bağası, şeteldik balamalarmen teñdesip twr. Olardıñ öz elimizde öndirilgenine qaramastan, qımbat boluı halıqtıñ qaltasına salmaq tüsiredi» degen şağımdar jii aytılıp jür. Şındığında, jalğa alatın orındardıñ qımbat boluı, tanıstırudı qajet etpeytin şeteldik brendtermen salıstırğanda, el qwlağına jetkizudi talap etetin otandıq tauardıñ jarnama kampaniyası, qızmetkerlerge tölenetin aqı şığındarın qosqanda, önimniñ soñğı bağası birneşe ese köterilip şığa keledi. Sondıqtan biz narıqtağı eñ tömengi bağalardı ornatu üşin, otandıq tauar öndiruşilerden jalğa beru aqısın almaymız», - deydi dükenniñ negizgi qwrılu maqsatı men erekşeligin aqtarıla äñgimelegen qauımdastıq basşısı Ekaterina Kim.

Barlıq tauarlarğa jeñildikter aptalığı jürip jatır

Jalpı aumağı 1 mıñ şarşı metrdi qwraytın dükende 5 mıñğa juıq otandıq tauar belgileri saudağa qoyıladı. Qazirdiñ özinde 200-ge juıq kiim men ayaq kiim, 100-ge juıq azıq-tülik, 40 auıl şaruaşılıq, 15 kosmetikalıq jäne twrmıstıq himiya önimderiniñ türleri düken sörelerinen orın tapqan. Joba jetekşileri tauar öndiruşilerin jalğa beriletin aqıdan bosatqanımen, paydanıñ 10 payızına ortaqtasu turalı kelisimge otıradı. Eger käsipkerdiñ saudası bolmay, önimi satılmasa, düken basşılığı da üles swramaydı.

Otandıq tätti-dämdiler söresi

Qazirgi tañda käsip jürgizudegi äleumettik jelilerdegi marketingtiñ mañızdılığın eşkim joqqa şığara almaydı. Halıqtıñ otandıq tauarlarğa degen qızığuşılığın arttırıp, dükenniñ twraqtı twtınuşılarınıñ qatarın köbeytuge qazaqstandıq belgili blogerlerden qwralğan arnayı top jwmıs isteydi. Dükendegi kezekti is-şaranıñ beyne tüsirilimin jasap jürgen bloger Mädi Aytimov köpşilikke arnalğan jeñildikter men tartımdı jobalar turalı bizben quana bölisti: «Bügin näzik jandılar qauımınıñ qatısuımen, sänge arnalğan mereke ötip jatır. Bayqau nätijesinde anıqtalğan jeñimpazdar käsibi sängerlerdiñ qolınan betin ärlep, dükendegi kiim kollekciyasınan tegin köylekterdi sıyğa aladı. Ötken jolı men jastarğa arnalğan fotosuret bayqauın ötkizdim. Mwndağı özge qız-jigitterdiñ qatısuımen kün sayın qızıqtı tanımdıq beynerolikter tüsirilip, köñildi şaralar wyımdastırıladı. Dükende qazir barlıq önimderge 30-70 payız aralığında jeñildikter qarastırılğan. Biz otandıq önimderge degen jılı közqaras pen köpşiliktiñ joğarı bağasın qalıptastıru jobasınıñ bir böligi bolğanımızğa öte quanıştımız».

Jarnama kampaniyasın jürgizuşi blogerler

Almatı oblısında  irimşik öndiretin «Formaggio Almaty» sauda belgisiniñ ieleri bwrın tek arnayı järmeñkelerge qatısıp, önimin äleumettik jelidegi paraqşa arqılı tüsken tapsırıstar boyınşa ğana saudalap kelgen. Endi dükennen arnayı orın alıp, twtınuşılardıñ nazarına irimşiktiñ ärtürli dämdegi birneşe türin wsınıp otır.

Taraz qalasınan kelgen dizayner Läzzat Säbitqızı da öziniñ wlttıq naqıştağı kiimder ülgisin bwrın qaladağı iri sauda üyleriniñ birinde satıp kelgenin aytıp, özine wsınılğan mümkindikten alğan äserin ortağa saldı: «Men bwrın sauda üyindegi ornımda är şarşı metr üşin 10 mıñ teñgeden töleytinmin. Mwnda barlığı tegin. Joba wyımdastıruşıları halıq köp keletin demalıs künderi paydadan alatın ülesterinen mülde bas tartıp otır. Bwl – bizdiñ bäsekege qabılettiligimizdi arttıruğa berilgen ülken mümkindik dep esepteymin».

Almatı qalasınıñ twrğını Djanzakova Alinanı balalar kiimderi qatarınan kezdestirdik. Är köylektiñ öñirindegi tigisin jiti tekserip twrğan jas anadan otandıq önimniñ sapasın swrağanımızda, ol: «Bwl meniñ «From KZ» dükenine alğaşqı keluim. Bwrın balalar kiimin iri sauda ortalıqtarınan alatınbız. Qazir salıstırıp qarasam, dayındalu tehnikası, tigisi men mata sapası jöninen bizdiñ tauarlar şeteldik kiimderden eş kem tüspeydi eken. Bağası da köñilge qonımdı», - dedi külimsirep.

Ekologiyalıq taza süt önimderi

Tağam önimderinen bastap, kündelikti twrmısta paydalanılatın zattar men otandıq dizaynerlerdiñ erler men äyelderge, balalarğa arnalğan kiim ülgileri, ayaq kiim men sömke, ämiyan, kädesıylar, tipti balalar oyınşıqtarına deyin keñ kölemdi tauarlar wsınatın jobanıñ jalpı qwnı – 120 mln teñge. Jaqın bolaşaqta otandıq tauarlar saudasımen aynalısatın dükender jelisin Qazaqstannıñ özge qalalarınan da  aşu josparlanıp otır. Jobanıñ äleumettik mañızdılığın erekşe bağalağan Kazkommerc banki dükenge berilgen aumaq aqısı tölemin jeñildetu üşin 6 ayğa deyingi qarjılıq kanikuldar qarastırıp otır.

«Eñ jaqsısı, öytkeni özimizdiki» degen wrandı wstanatın dükenniñ bastamasına sättilik tilep, twraqtı twtınuşısı bolamız degen uädemen qoştastıq.

“The Qazaq Times”