الماتى قالاسىندا تولىقتاي وتاندىق ونىمدەر ساۋداعا قويىلاتىن، تاۋلىك بويى جۇمىس ىستەيتىن «From KZ» كونتسەپتۋالدى دۇكەنى ىسكە قوسىلدى. قازاقستاندىق تاۋار وندىرۋشىلەردى قولداۋمەن اينالىساتىن «ۇلى جىبەك جولى» قاۋىمداستىعىنىڭ باستاماسىمەن قۇرىلعان دۇكەندەگى ساۋدا ورىندارى بارلىق وتاندىق تاۋار بەلگىلەرى ءۇشىن تەگىن بەرىلەدى.

ۇلتتىق ناقىشتاعى جەيدەلەر

«وسى ۋاقىتقا دەيىن «ساۋدا قاتارلارىنداعى وتاندىق تاۋارلاردىڭ باعاسى، شەتەلدىك بالامالارمەن تەڭدەسىپ تۇر. ولاردىڭ ءوز ەلىمىزدە وندىرىلگەنىنە قاراماستان، قىمبات بولۋى حالىقتىڭ قالتاسىنا سالماق تۇسىرەدى» دەگەن شاعىمدار ءجيى ايتىلىپ ءجۇر. شىندىعىندا، جالعا الاتىن ورىنداردىڭ قىمبات بولۋى، تانىستىرۋدى قاجەت ەتپەيتىن شەتەلدىك برەندتەرمەن سالىستىرعاندا، ەل قۇلاعىنا جەتكىزۋدى تالاپ ەتەتىن وتاندىق تاۋاردىڭ جارناما كامپانياسى، قىزمەتكەرلەرگە تولەنەتىن اقى شىعىندارىن قوسقاندا، ءونىمنىڭ سوڭعى باعاسى بىرنەشە ەسە كوتەرىلىپ شىعا كەلەدى. سوندىقتان ءبىز نارىقتاعى ەڭ تومەنگى باعالاردى ورناتۋ ءۇشىن، وتاندىق تاۋار وندىرۋشىلەردەن جالعا بەرۋ اقىسىن المايمىز»، - دەيدى دۇكەننىڭ نەگىزگى قۇرىلۋ ماقساتى مەن ەرەكشەلىگىن اقتارىلا اڭگىمەلەگەن قاۋىمداستىق باسشىسى ەكاتەرينا كيم.

بارلىق تاۋارلارعا جەڭىلدىكتەر اپتالىعى ءجۇرىپ جاتىر

جالپى اۋماعى 1 مىڭ شارشى مەتردى قۇرايتىن دۇكەندە 5 مىڭعا جۋىق وتاندىق تاۋار بەلگىلەرى ساۋداعا قويىلادى. قازىردىڭ وزىندە 200-گە جۋىق كيىم مەن اياق كيىم، 100-گە جۋىق ازىق-تۇلىك، 40 اۋىل شارۋاشىلىق، 15 كوسمەتيكالىق جانە تۇرمىستىق حيميا ونىمدەرىنىڭ تۇرلەرى دۇكەن سورەلەرىنەن ورىن تاپقان. جوبا جەتەكشىلەرى تاۋار وندىرۋشىلەرىن جالعا بەرىلەتىن اقىدان بوساتقانىمەن، پايدانىڭ 10 پايىزىنا ورتاقتاسۋ تۋرالى كەلىسىمگە وتىرادى. ەگەر كاسىپكەردىڭ ساۋداسى بولماي، ءونىمى ساتىلماسا، دۇكەن باسشىلىعى دا ۇلەس سۇرامايدى.

وتاندىق ءتاتتى-دامدىلەر سورەسى

قازىرگى تاڭدا كاسىپ جۇرگىزۋدەگى الەۋمەتتىك جەلىلەردەگى ماركەتينگتىڭ ماڭىزدىلىعىن ەشكىم جوققا شىعارا المايدى. حالىقتىڭ وتاندىق تاۋارلارعا دەگەن قىزىعۋشىلىعىن ارتتىرىپ، دۇكەننىڭ تۇراقتى تۇتىنۋشىلارىنىڭ قاتارىن كوبەيتۋگە قازاقستاندىق بەلگىلى بلوگەرلەردەن قۇرالعان ارنايى توپ جۇمىس ىستەيدى. دۇكەندەگى كەزەكتى ءىس-شارانىڭ بەينە ءتۇسىرىلىمىن جاساپ جۇرگەن بلوگەر ءمادي ايتيموۆ كوپشىلىككە ارنالعان جەڭىلدىكتەر مەن تارتىمدى جوبالار تۋرالى بىزبەن قۋانا ءبولىستى: «بۇگىن نازىك جاندىلار قاۋىمىنىڭ قاتىسۋىمەن، سانگە ارنالعان مەرەكە ءوتىپ جاتىر. بايقاۋ ناتيجەسىندە انىقتالعان جەڭىمپازدار كاسىبي سانگەرلەردىڭ قولىنان بەتىن ارلەپ، دۇكەندەگى كيىم كوللەكتسياسىنان تەگىن كويلەكتەردى سىيعا الادى. وتكەن جولى مەن جاستارعا ارنالعان فوتوسۋرەت بايقاۋىن وتكىزدىم. مۇنداعى وزگە قىز-جىگىتتەردىڭ قاتىسۋىمەن كۇن سايىن قىزىقتى تانىمدىق بەينەروليكتەر ءتۇسىرىلىپ، كوڭىلدى شارالار ۇيىمداستىرىلادى. دۇكەندە قازىر بارلىق ونىمدەرگە 30-70 پايىز ارالىعىندا جەڭىلدىكتەر قاراستىرىلعان. ءبىز وتاندىق ونىمدەرگە دەگەن جىلى كوزقاراس پەن كوپشىلىكتىڭ جوعارى باعاسىن قالىپتاستىرۋ جوباسىنىڭ ءبىر بولىگى بولعانىمىزعا وتە قۋانىشتىمىز».

جارناما كامپانياسىن جۇرگىزۋشى بلوگەرلەر

الماتى وبلىسىندا  ىرىمشىك وندىرەتىن «Formaggio Almaty» ساۋدا بەلگىسىنىڭ يەلەرى بۇرىن تەك ارنايى جارمەڭكەلەرگە قاتىسىپ، ءونىمىن الەۋمەتتىك جەلىدەگى پاراقشا ارقىلى تۇسكەن تاپسىرىستار بويىنشا عانا ساۋدالاپ كەلگەن. ەندى دۇكەننەن ارنايى ورىن الىپ، تۇتىنۋشىلاردىڭ نازارىنا ىرىمشىكتىڭ ءارتۇرلى دامدەگى بىرنەشە ءتۇرىن ۇسىنىپ وتىر.

تاراز قالاسىنان كەلگەن ديزاينەر ءلاززات سابيتقىزى دا ءوزىنىڭ ۇلتتىق ناقىشتاعى كيىمدەر ۇلگىسىن بۇرىن قالاداعى ءىرى ساۋدا ۇيلەرىنىڭ بىرىندە ساتىپ كەلگەنىن ايتىپ، وزىنە ۇسىنىلعان مۇمكىندىكتەن العان اسەرىن ورتاعا سالدى: «مەن بۇرىن ساۋدا ۇيىندەگى ورنىمدا ءار شارشى مەتر ءۇشىن 10 مىڭ تەڭگەدەن تولەيتىنمىن. مۇندا بارلىعى تەگىن. جوبا ۇيىمداستىرۋشىلارى حالىق كوپ كەلەتىن دەمالىس كۇندەرى پايدادان الاتىن ۇلەستەرىنەن مۇلدە باس تارتىپ وتىر. بۇل – ءبىزدىڭ باسەكەگە قابىلەتتىلىگىمىزدى ارتتىرۋعا بەرىلگەن ۇلكەن مۇمكىندىك دەپ ەسەپتەيمىن».

الماتى قالاسىنىڭ تۇرعىنى دجانزاكوۆا الينانى بالالار كيىمدەرى قاتارىنان كەزدەستىردىك. ءار كويلەكتىڭ وڭىرىندەگى تىگىسىن ءجىتى تەكسەرىپ تۇرعان جاس انادان وتاندىق ءونىمنىڭ ساپاسىن سۇراعانىمىزدا، ول: «بۇل مەنىڭ «From KZ» دۇكەنىنە العاشقى كەلۋىم. بۇرىن بالالار كيىمىن ءىرى ساۋدا ورتالىقتارىنان الاتىنبىز. قازىر سالىستىرىپ قاراسام، دايىندالۋ تەحنيكاسى، تىگىسى مەن ماتا ساپاسى جونىنەن ءبىزدىڭ تاۋارلار شەتەلدىك كيىمدەردەن ەش كەم تۇسپەيدى ەكەن. باعاسى دا كوڭىلگە قونىمدى»، - دەدى كۇلىمسىرەپ.

ەكولوگيالىق تازا ءسۇت ونىمدەرى

تاعام ونىمدەرىنەن باستاپ، كۇندەلىكتى تۇرمىستا پايدالانىلاتىن زاتتار مەن وتاندىق ديزاينەرلەردىڭ ەرلەر مەن ايەلدەرگە، بالالارعا ارنالعان كيىم ۇلگىلەرى، اياق كيىم مەن سومكە، ءاميان، كادەسىيلار، ءتىپتى بالالار ويىنشىقتارىنا دەيىن كەڭ كولەمدى تاۋارلار ۇسىناتىن جوبانىڭ جالپى قۇنى – 120 ملن تەڭگە. جاقىن بولاشاقتا وتاندىق تاۋارلار ساۋداسىمەن اينالىساتىن دۇكەندەر جەلىسىن قازاقستاننىڭ وزگە قالالارىنان دا  اشۋ جوسپارلانىپ وتىر. جوبانىڭ الەۋمەتتىك ماڭىزدىلىعىن ەرەكشە باعالاعان كازكوممەرتس بانكى دۇكەنگە بەرىلگەن اۋماق اقىسى تولەمىن جەڭىلدەتۋ ءۇشىن 6 ايعا دەيىنگى قارجىلىق كانيكۋلدار قاراستىرىپ وتىر.

«ەڭ جاقسىسى، ويتكەنى وزىمىزدىكى» دەگەن ۇراندى ۇستاناتىن دۇكەننىڭ باستاماسىنا ساتتىلىك تىلەپ، تۇراقتى تۇتىنۋشىسى بولامىز دەگەن ۋادەمەن قوشتاستىق.

“The Qazaq Times”