Foto: Kursiv.kz

Aqmola oblısına qarastı Atbasar qalasında 21 jastağı Wlttıq qauipsizdik komitetiniñ agenti Aydın Aypqalievtiñ üstinen terrorizmdi nasihattağını üşin qılmıstıq is qozğaldı dep habarlaydı centre1.com saytı.

Aydın Aypqaliev üstinen 2017 jıldıñ 25 qañtarında QR Qılmıstıq kodeksiniñ 174 babınıñ 1 tarmağı (Äleumettik, rulıq, näsildik, wlttıq, dini arazdıq tuğızu) boyınşa, 256 baptıñ 2 tarmağı (Terrorizmdi nasihattap, terrorlıq akt jasauğa ügitteu) boyınşa qılmıstıq is qozğalıp, qamauğa alınğan.

Aydın Aypqaliev. Foto: centre1.com

Biraq, Aydın Aypqalievtiñ anası Güljan Aypqalievanıñ aytuınşa, onıñ wlı qılmısker emes. Ol WQK tapsırması boyınşa özge dinniñ jeteginde jürgen adamdarmen aralasqan. WQK qızmetkerleri olardıñ üyine tintu jasauğa kelgenda Aydın anasına «Men osılarğa jwmıs isteymin. Mağan Daniyar (WQK qızmetkeri) tapsırma bergen» dep aytqan.

Aydın Aypqaliev qamaluınan birneşe kün bwrın anasına "Wlttıq qauipsizdik komitetine jwmıs isteuden bas tartqanı jäne olardıñ onı osı uaqıtqa deyin aldap kelgeni jayında da aytqan.

Güljan Aypqalievanıñ sözinşe, WQK qızmetkerleri Aydın Aypqalievqa «Bizdiñ jwmısımız adamdardı türmege qamau emes, bizdiñ jwmıs terrorizmniñ aldın alu. Özge ağımdardıñ jeteginde jürgen azamattardı tüzu jolğa salu» degen. Biraq  Aydın Aypqaliev öziniñ kesirinen özge adamdı sottağannan keyin WQK-ge jwmıs isteuden bas tartqan. Osı kezde Wlttıq qauipsizdik komitetiniñ qızmetkerleri oğan «egerde bizge jwmıs istemeseñ, onda seni de türmege qamaymız» dep qorqıtqan.

Aydın Aypqalievtiñ qorğauşısı Ayman Omarovanıñ aytuınşa, Aypqaliev 16 jısınan bastap Wlttıq qauipsizdik komitetine jwmıs istegen.

Bwl faktini alğaşında osı is boyınşa kuägerlik etken WQK qızmetkeri de rastağan. Biraq, keyinen ol bwl sözinen bas tartqan.

Qwqıq qorğau organdarınıñ mälimeti boyınşa, Aydın Aypqaliev türli halıqaralıq terroristik wyımdardıñ şırmauına tüsip «VKontakte» äleumettik jelisi arqılı olardıñ ideologiyasın nasihattağan.

Biraq WQK-nıñ Aypqalievqa taqqan bwl ayıbımen onıñ qorğauşısı Ayman Omarova kelispeydi. Onıñ aytuınşa, Aypqalievtıñ radikaldı dini wyımdar ideologiyasın nasihattauınıñ bastı sebebi  - jastayınan Wlttıq qauipsizdik komitetiniñ onı osı wyımdardıñ arasına kirgizuiniñ saldarınan. Zañ jüzinde WQK-nıñ Aypqalievti kämelettik jasqa tolmay özine qızmet istetuge qwqığı joq.

Qazirgi uaqıtta Aypqalievtiñ jaqındarı onıñ qorğauşısımen birigip bwl iske baylanıstı öz zertteulerin jürgizude. Olardıñ oyınşa, bwl istiñ anıq-qanığına jetu üşin bwl oqiğağa qoğam nazarın audartu kerek.

“The Qazaq Times”