AQŞ Phen'yanmen sauda jürgizgen kez-kelgen elge qarsı sankciya jariyalaydı

AQŞ Phen'yanmen sauda jürgizgen kez-kelgen elge qarsı sankciya jariyalaydı. Bwl turalı BWW-nıñ Qauipsizdik keñesiniñ otırısında AQŞ-tıñ BWW-dağı twraqtı ökili Nikki Heyli mälimdedi. 

«Biz Korey Halıq Demokratiyalıq Respublikasınan bölek, onımen sauda baylanıstarın ornatqan kez-kelgen elge qarsı qatañ şaralar qoldanatın bolamız. Büginde Soltüstik Koreyanıñ BWW Qauipsizdik keñesiniñ rezolyuciyasın bwzuına jol berip otırğan memleketter bar. Ol elderdiñ AQŞ-pen ekonomikalıq, diplomatiyalıq baylanıstarına ülken ziyan kelui mümkin».

Twraqtı ökil Soltüstik Koreyanıñ sırtqı sauda aynalımınıñ 90 payızın qamtamasız etetin Qıtayğa erekşe eskertu jasadı.  "Biz beybitşilikti qalaytın kez-kelgen elmen dostıq qarım-qatınasımızdı jalğastıra beremiz. Onıñ qatarında Qıtay da bar. Biraq bügingi "qauipti" künge jetkizgen ötkenniñ qatelikterin qaytalauğa bolmaydı" degen Nikki Heyli Resey ökiline bağıttalğan joldauında Phen'yannıñ soñğı äreketterinen keyin älemdik qauımdastıq bolıp, Soltüstik Koreyağa qarsı şaralardı qatañdatuğa şaqırdı. "Eger sizder bwl wsınıstı qabıldamasañızdar, AQŞ bwl şielenisti şeşude öz jolın tañdaydı".

Bwl batıl mälimdemege qarap, Reseydiñ Federaciya keñesi qauipsizdik komitetiniñ müşesi Aleksey Puşkov: "Soltüstik Koreya - D.Tramp üşin "Irak"-qa aynaluı mümkin. Buştıñ twsında Irakta bolğan soğıs örti Obamanıñ kezinde Liviyada jalğasın taptı. Endi Tramp üşin Soltüstik Koreya Iraktıñ tağdırın qaytalauı mümkin" degen boljam jasadı.

“The Qazaq Times”