فوتو: Luiz Rampelotto/EuropaNewswire/Global Look Press

اقش پحەنيانمەن ساۋدا جۇرگىزگەن كەز-كەلگەن ەلگە قارسى سانكتسيا جاريالايدى. بۇل تۋرالى بۇۇ-نىڭ قاۋىپسىزدىك كەڭەسىنىڭ وتىرىسىندا اقش-تىڭ بۇۇ-داعى تۇراقتى وكىلى نيككي حەيلي مالىمدەدى. 

«ءبىز كورەي حالىق دەموكراتيالىق رەسپۋبليكاسىنان بولەك، ونىمەن ساۋدا بايلانىستارىن ورناتقان كەز-كەلگەن ەلگە قارسى قاتاڭ شارالار قولداناتىن بولامىز. بۇگىندە سولتۇستىك كورەيانىڭ بۇۇ قاۋىپسىزدىك كەڭەسىنىڭ رەزوليۋتسياسىن بۇزۋىنا جول بەرىپ وتىرعان مەملەكەتتەر بار. ول ەلدەردىڭ اقش-پەن ەكونوميكالىق، ديپلوماتيالىق بايلانىستارىنا ۇلكەن زيان كەلۋى مۇمكىن».

تۇراقتى وكىل سولتۇستىك كورەيانىڭ سىرتقى ساۋدا اينالىمىنىڭ 90 پايىزىن قامتاماسىز ەتەتىن قىتايعا ەرەكشە ەسكەرتۋ جاسادى.  "بىز بەيبىتشىلىكتى قالايتىن كەز-كەلگەن ەلمەن دوستىق قارىم-قاتىناسىمىزدى جالعاستىرا بەرەمىز. ونىڭ قاتارىندا قىتاي دا بار. بىراق بۇگىنگى "قاۋىپتى" كۇنگە جەتكىزگەن وتكەننىڭ قاتەلىكتەرىن قايتالاۋعا بولمايدى" دەگەن نيككي حەيلي رەسەي وكىلىنە باعىتتالعان جولداۋىندا پحەنياننىڭ سوڭعى ارەكەتتەرىنەن كەيىن الەمدىك قاۋىمداستىق بولىپ، سولتۇستىك كورەياعا قارسى شارالاردى قاتاڭداتۋعا شاقىردى. "ەگەر سىزدەر بۇل ۇسىنىستى قابىلداماساڭىزدار، اقش بۇل شيەلەنىستى شەشۋدە ءوز جولىن تاڭدايدى".

بۇل باتىل مالىمدەمەگە قاراپ، رەسەيدىڭ فەدەراتسيا كەڭەسى قاۋىپسىزدىك كوميتەتىنىڭ مۇشەسى الەكسەي پۋشكوۆ: "سولتۇستىك كورەيا - د.ترامپ ءۇشىن "يراك"-قا اينالۋى مۇمكىن. بۋشتىڭ تۇسىندا يراكتا بولعان سوعىس ءورتى وبامانىڭ كەزىندە ليۆيادا جالعاسىن تاپتى. ەندى ترامپ ءۇشىن سولتۇستىك كورەيا يراكتىڭ تاعدىرىن قايتالاۋى مۇمكىن" دەگەن بولجام جاسادى.

“The Qazaq Times”