Foto: Forbes.kz

Äzerbayjannıñ halıqaralıq bankine salınğan qazaqstandıqtardıñ zeynetaqı qarjısı sol eldiñ ükimettik qarızı retinde konvertaciyalanuı mümkin. Qazaqstan aldağı uaqıtta ÄHB mindetterin qayta qwrılımdau kezinde osı poziciyanı negizge aladı. Bwl turalı bügin Astanada ötip jatqan ekonomikalıq forumı ayasında BJZQ direktorlar keñesiniñ müşesi, "Astana" halıqaralıq qarjı ortalığınıñ törağası Qayrat Kelimbetov mälimdedi.

Onıñ sözinşe, ÄHB qarızın qayta qwrılımdau procesi boyınşa dauıs beru jwmıstarı bügin-erteñ bastaladı.

«Qazaqstan Äzerbayjan tarapınan wsınılğan ekinşi nwsqanı paydalanadı dep oylaymın. Ekinşi nwsqa boyınşa, banktiñ obligaciyalarına salınğan zeynetaqı qarjısı Äzerbayjan bankiniñ obligaciyalarına auısadı, yağni jıldıñ 3,5%-ben 15 jılda qaytarıladı", - dedi Kelimbetov.

Sonday-aq, Kelimbetov kelissözder kezinde negizgi qarız kölemin qısqartu bolmaytının atap ötti. "Qoğamdağı alañdauşılıq seyiledi dep oylaymın, öytkeni barlıq qarjı tolıq kölemde qaytarıladı", - dedi ol.

Ayta keteyik, mamır ayında  qazaqstandıq ekonomister tarapınan Äzerbayjan halıqaralıq bankine zeynetaqı qorınıñ 71,3 mlrd teñgesi investiciyalanğanı turalı aqparat tarağan edi. Osıdan keyin 23 mamır küni Äzerbayjan banki kreditorlar aldındağı borıştı qwrılımdaudıñ üş nwsqasın wsınğan. Olar wsınğan üş nwsqa tömendegidey:

  • Birinşisi - ÄHB-tiñ 250 mln dollar qarızın Äzirbayjan Respublikasınıñ memlekettik qwndı qağazdarı türinde 200 mln AQŞ dollar etip, 12 jılda 5,125 payız mölşerlememen qaytaru.
  • Ekinşisi - 250 mln dollar qarızdı Äzirbayjan Respublikasınıñ memlekettik qwndı qağazdarı retinde 15 jılda 3,5 payızdıq mölşerlememen qaytaru.
  • Üşinşisi - 250 mln AQŞ dolların Äzirbayjan Respublikasınıñ memlekettik qwndı qağazdarı retinde 7 jılda 3,5 payızdıq üstememen 250 mln AQŞ dollar etip qaytaru.

Al Wlttıq bank törağası Daniyar Aqışev bolsa Äzerbayjan halıqaralıq bankine investiciyalanğan 71,3 mld teñgege qatıstı jağdaydı "bwl qarjını problemalı bankke Wlttıq banktiñ bwrınğı qızmetkerleri investiciyalağan" dep tüsindirdi.

"The Qazaq Times"