Astanada ekinşi Euraziyalıq halıqaralıq kitap körme-järmeñkesi ötedi

 2017 jılğı 15-18 mausım aralığında Astana qalasındağı «Körme» ortalığında ekinşi Euraziyalıq halıqaralıq kitap körme-järmeñkesi   ötedi. Bwl turalı Euraziyalıq halıqaralıq kitap körme-järmeñkesi atqaruşı direkciyasınıñ baspasöz qızmeti habarladı.

Qazirge deyin älemniñ 25 elinen 90-nan astam kompaniya men wyım körmege qatısuğa ötiniş bildirdi, olardıñ işinde, Qazaqstan, Resey, Belarus, Qırğızstan, Äzerbayjan, Täjikstan, Türkiya, Qıtay, Ündistan jäne basqa da elderdiñ ökilderi bar.

Körme şeñberinde auqımdı mädeni-iskerlik bağdarlama ötkizu josparlanıp otır, onıñ barısında tanıstıru räsimderi, döñgelek üstelder, tanımal mädeniet qayratkerlerimen, jazuşılar jäne aqındarmen kezdesuler, forumdar, bayqaular wyımdastırıladı. Jalpı alğanda, körmeniñ qazaqstandıq jäne şeteldik qatısuşıları tarapınan 100-ge juıq mädeni-iskerlik is-şaralardı ötkizu jäne etnomädeni birlestikterdiñ öner körsetui josparlanıp otır.

15 mausımda Qazaqstannıñ Sırtqı ister ministrliginiñ qatısuımen Kanadada ağılşın tilinde jarıq körgen «Astana: säulet öneri, añızdar men bağıştalu» kitabınıñ twsaukeseri boladı. Kitaptıñ avtorı – tarih ğılımdarınıñ doktorı, Vinnipeg universitetiniñ oqıtuşısı, professor F. Al'bo.

17 mausımda ispan halqınıñ ataqtı aqını Husto Horhe Padronnıñ qazaq tiline audarılıp basılğan «Tozaq şeñberleri» kitabınıñ avtor özi qatısatın halıqaralıq twsaukeseri boladı.

Pol'şalıq «Kurtiak&Ley» körkem ädebiet baspası ayrıqşa dizaynerlik şeşimde orındalğan eksklyuzivti basılımdardıñ biregey toptamasın wsınadı. Sonımen qatar, sıylıqqa arnalğan kitaptardıñ bwl toptamasında  «Abay» kitabı da nazarğa wsınıladı.

«Gil'diya knijnikov» kommerciyalıq emes seriktestigi men Resey kitap şığaruşılar qauımdastığı wsınatın reseylik bağdarlama bay jäne jan-jaqtı boladı dep kütilude.

Orınborlıq «Evraziya» qayırımdılıq qorı bağdarlamalar ciklın wyımdastıradı. Jekeley alğanda, orınborlıq-almatılıq suretşi  Sergey Kalmıkovqa arnalğan basılımnıñ, mısalı, onıñ «Orıs avangardınıñ soñğısı» jäne «Orınborğa madaq» eñbekteri al'bomdarınıñ  twsaukeseri josparlanıp otır.

Audarmaşı, oqıtuşı, «Kul'tura» telearnasındağı «Poliglot»  realiti-şouınıñ telejürgizuşisi Dmitriy Petrovpen kezdesu jastar tarapınan ülken qızığuşılıqqa ie boladı dep kütilude. Dmitriy Petrovtıñ Innovaciyalıq-kommunikativti lingvistika ortalığı orıs tilinen aşıq sabaq jäne orıs tilin oqıtu ädistemesiniñ tanıstıru räsimin ötkizedi.

Körme-järmeñkede Reseydiñ Merzimdi basılımdar, kitap şığaru, kitap taratu jäne poligrafiya salalarındağı äriptestik boyınşa memleketaralıq keñeske (Mäskeu qalası) törağalıq etui ayasında wyımdastırılatın TMD-ğa qatısuşı memleketterdiñ «Kitap öneri – 2017» halıqaralıq bayqauınıñ twsaukeseri boladı. Twsaukeserdi Resey baspagerleriniñ wlttıq qauımdastığınıñ prezidenti A.V. Avdonin ötkizedi.

Belarus baspaları körmede 500-den astam basılımdardı, yağni, Belarus Respublikasında şığatın ädebietterdiñ barlıq qatarın, onıñ işinde, eltanu, körkem ädebiet, oqulıqtar, balalarğa arnalğan kitaptar jäne tağı basqaların wsınadı.

Oyındar, bayqaular, şeberlik sınıptarı, vokaldıq nömirler men bilerden qwralatın balalarğa arnalğan bağdarlama jan-jaqtı jäne tolıq qamtılğan bolmaq.

Körme ayasında «Üzdik oqulıq kitap», «Üzdik ölketanu basılımı», «Balalar men jasöspirimderge arnalğan üzdik basılım», «Körme-järmeñkede wsınılğan üzdik ekspoziciya», «Ğılım jäne innovaciyalar», «Bas jülde» degen altı atalım boyınşa üzdik basılımdı anıqtauğa bağıttalğan «Eurasian Book Fair – 2017»  bayqauı ötkiziledi. Bayqaudıñ jeñimpazdarı men qatısuşıları medal'dar, diplomdar men bağalı sıylıqtarğa ie boladı.

Körme-järmeñkege qatısuşılardıñ barlığın tosın sıy kütip twr: mwnda kelgen ärbir adam körmeniñ ötu merzimi işinde kün sayın bolatın bağalı sıylıqtar oyınına qatısa aladı.

“The Qazaq Times”