استانادا ەكىنشى ەۋرازيالىق حالىقارالىق كىتاپ كورمە-جارمەڭكەسى وتەدى

 2017 جىلعى 15-18 ماۋسىم ارالىعىندا استانا قالاسىنداعى «كورمە» ورتالىعىندا ەكىنشى ەۋرازيالىق حالىقارالىق كىتاپ كورمە-جارمەڭكەسى   وتەدى. بۇل تۋرالى ەۋرازيالىق حالىقارالىق كىتاپ كورمە-جارمەڭكەسى اتقارۋشى ديرەكتسياسىنىڭ ءباسپاسوز قىزمەتى حابارلادى.

قازىرگە دەيىن الەمنىڭ 25 ەلىنەن 90-نان استام كومپانيا مەن ۇيىم كورمەگە قاتىسۋعا ءوتىنىش ءبىلدىردى، ولاردىڭ ىشىندە، قازاقستان، رەسەي، بەلارۋس، قىرعىزستان، ازەربايجان، تاجىكستان، تۇركيا، قىتاي، ءۇندىستان جانە باسقا دا ەلدەردىڭ وكىلدەرى بار.

كورمە شەڭبەرىندە اۋقىمدى مادەني-ىسكەرلىك باعدارلاما وتكىزۋ جوسپارلانىپ وتىر، ونىڭ بارىسىندا تانىستىرۋ راسىمدەرى، دوڭگەلەك ۇستەلدەر، تانىمال مادەنيەت قايراتكەرلەرىمەن، جازۋشىلار جانە اقىندارمەن كەزدەسۋلەر، فورۋمدار، بايقاۋلار ۇيىمداستىرىلادى. جالپى العاندا، كورمەنىڭ قازاقستاندىق جانە شەتەلدىك قاتىسۋشىلارى تاراپىنان 100-گە جۋىق مادەني-ىسكەرلىك ءىس-شارالاردى وتكىزۋ جانە ەتنومادەني بىرلەستىكتەردىڭ ونەر كورسەتۋى جوسپارلانىپ وتىر.

15 ماۋسىمدا قازاقستاننىڭ سىرتقى ىستەر مينيسترلىگىنىڭ قاتىسۋىمەن كانادادا اعىلشىن تىلىندە جارىق كورگەن «استانا: ساۋلەت ونەرى، اڭىزدار مەن باعىشتالۋ» كىتابىنىڭ تۇساۋكەسەرى بولادى. كىتاپتىڭ اۆتورى – تاريح عىلىمدارىنىڭ دوكتورى، ۆيننيپەگ ۋنيۆەرسيتەتىنىڭ وقىتۋشىسى، پروفەسسور ف. البو.

17 ماۋسىمدا يسپان حالقىنىڭ اتاقتى اقىنى حۋستو حورحە پادروننىڭ قازاق تىلىنە اۋدارىلىپ باسىلعان «توزاق شەڭبەرلەرى» كىتابىنىڭ اۆتور ءوزى قاتىساتىن حالىقارالىق تۇساۋكەسەرى بولادى.

پولشالىق «Kurtiak&Ley» كوركەم ادەبيەت باسپاسى ايرىقشا ديزاينەرلىك شەشىمدە ورىندالعان ەكسكليۋزيۆتى باسىلىمداردىڭ بىرەگەي توپتاماسىن ۇسىنادى. سونىمەن قاتار، سىيلىققا ارنالعان كىتاپتاردىڭ بۇل توپتاماسىندا  «اباي» كىتابى دا نازارعا ۇسىنىلادى.

«گيلديا كنيجنيكوۆ» كوممەرتسيالىق ەمەس سەرىكتەستىگى مەن رەسەي كىتاپ شىعارۋشىلار قاۋىمداستىعى ۇسىناتىن رەسەيلىك باعدارلاما باي جانە جان-جاقتى بولادى دەپ كۇتىلۋدە.

ورىنبورلىق «ەۆرازيا» قايىرىمدىلىق قورى باعدارلامالار تسيكلىن ۇيىمداستىرادى. جەكەلەي العاندا، ورىنبورلىق-الماتىلىق سۋرەتشى  سەرگەي كالمىكوۆقا ارنالعان باسىلىمنىڭ، مىسالى، ونىڭ «ورىس اۆانگاردىنىڭ سوڭعىسى» جانە «ورىنبورعا ماداق» ەڭبەكتەرى البومدارىنىڭ  تۇساۋكەسەرى جوسپارلانىپ وتىر.

اۋدارماشى، وقىتۋشى، «كۋلتۋرا» تەلەارناسىنداعى «پوليگلوت»  رەاليتي-شوۋىنىڭ تەلەجۇرگىزۋشىسى دميتري پەتروۆپەن كەزدەسۋ جاستار تاراپىنان ۇلكەن قىزىعۋشىلىققا يە بولادى دەپ كۇتىلۋدە. دميتري پەتروۆتىڭ يننوۆاتسيالىق-كوممۋنيكاتيۆتى لينگۆيستيكا ورتالىعى ورىس تىلىنەن اشىق ساباق جانە ورىس ءتىلىن وقىتۋ ادىستەمەسىنىڭ تانىستىرۋ ءراسىمىن وتكىزەدى.

كورمە-جارمەڭكەدە رەسەيدىڭ مەرزىمدى باسىلىمدار، كىتاپ شىعارۋ، كىتاپ تاراتۋ جانە پوليگرافيا سالالارىنداعى ارىپتەستىك بويىنشا مەملەكەتارالىق كەڭەسكە (ماسكەۋ قالاسى) توراعالىق ەتۋى اياسىندا ۇيىمداستىرىلاتىن تمد-عا قاتىسۋشى مەملەكەتتەردىڭ «كىتاپ ونەرى – 2017» حالىقارالىق بايقاۋىنىڭ تۇساۋكەسەرى بولادى. تۇساۋكەسەردى رەسەي باسپاگەرلەرىنىڭ ۇلتتىق قاۋىمداستىعىنىڭ پرەزيدەنتى ا.ۆ. اۆدونين وتكىزەدى.

بەلارۋس باسپالارى كورمەدە 500-دەن استام باسىلىمداردى، ياعني، بەلارۋس رەسپۋبليكاسىندا شىعاتىن ادەبيەتتەردىڭ بارلىق قاتارىن، ونىڭ ىشىندە، ەلتانۋ، كوركەم ادەبيەت، وقۋلىقتار، بالالارعا ارنالعان كىتاپتار جانە تاعى باسقالارىن ۇسىنادى.

ويىندار، بايقاۋلار، شەبەرلىك سىنىپتارى، ۆوكالدىق نومىرلەر مەن بيلەردەن قۇرالاتىن بالالارعا ارنالعان باعدارلاما جان-جاقتى جانە تولىق قامتىلعان بولماق.

كورمە اياسىندا «ۇزدىك وقۋلىق كىتاپ»، «ۇزدىك ولكەتانۋ باسىلىمى»، «بالالار مەن جاسوسپىرىمدەرگە ارنالعان ۇزدىك باسىلىم»، «كورمە-جارمەڭكەدە ۇسىنىلعان ۇزدىك ەكسپوزيتسيا»، «عىلىم جانە يننوۆاتسيالار»، «باس جۇلدە» دەگەن التى اتالىم بويىنشا ۇزدىك باسىلىمدى انىقتاۋعا باعىتتالعان «Eurasian Book Fair – 2017»  بايقاۋى وتكىزىلەدى. بايقاۋدىڭ جەڭىمپازدارى مەن قاتىسۋشىلارى مەدالدار، ديپلومدار مەن باعالى سىيلىقتارعا يە بولادى.

كورمە-جارمەڭكەگە قاتىسۋشىلاردىڭ بارلىعىن توسىن سىي كۇتىپ تۇر: مۇندا كەلگەن ءاربىر ادام كورمەنىڭ ءوتۋ مەرزىمى ىشىندە كۇن سايىن بولاتىن باعالى سىيلىقتار ويىنىنا قاتىسا الادى.

“The Qazaq Times”