Foto: alau.kz

2017 jıldıñ 1 toqsanınıñ nätijesi boyınşa Qazaqstandağı ortaşa jalaqı 140,3 mıñ teñge boldı. Bwl 2016 jıldıñ 1 toqsanındağı körsetkişke qarağanda 5,6%-ğa joğarı eken. Sonday-aq, iri jäne orta käsiporındardağı qızmetkerlerdiñ jalaqısı 155,4 mıñ teñgege deyin ösken jäne bwl ötken jıldıñ säykes kezeñine qarağanda 6,6% joğarı, dep habarlaydı ranking.kz.

Agenttiktiñ mälimetinşe, osı jıldıñ 1 toqsanında iri kompaniyalardağı qızmetkerlerdiñ jalaqısı Qazaqstandağı ortaşa jalaqıdan 10,8%-ğa joğarı bolğan. Salıstırsaq, ötken jılı bwl körsetkiş 9,8%-dı qwraptı.

Öñirlerdegi jalaqı deñgeyine keler bolsaq, eñ joğarqı eñbekaqı mwnaylı aymaqta. Mısalı Atırau oblısında 256,2 mıñ teñge. Biraq ötken jılmen salıstırğanda -0,4%-ğa kemigen. Al Mañğıstau oblısındağı eñbekaqı 247,3 mıñ teñgeni qwrap, +0,4%-ğa köterilgen. Astanadağı jalaqı deñgeyi -  203,5 mıñ teñge jäne bir jılda +7,6%-ğa ösken.

Sonday-aq, Batıs Qazaqstan oblısında orta jäne iri kompaniya qızmetkerleriniñ jalaqısı ortaşa aylıq jalaqımen salıstırğanda qarqındı wlğayğan. Mısalı kompaniyalar özderiniñ qolastındağılarğa öñirdegi ortaşa nominaldı jalaqı deñgeyinen 18,7%-ğa artıq tölegen. Mwnday ürdis Mañğıstau (14,7%) jäne Atırau oblısında da (14,4%) bayqaladı.

 

“The Qazaq Times”